រៀបការមិនទាន់បានមួយខែផង ស្គាល់កន្លែងម៉ែក្មេកលាក់លុយ មានអីគាស់យកខ្ទេចហើយគេចខ្លួនបាត់ !!!

ខេត្តព្រៃវែង ៖ កាលពីព្រឹកថ្ងៃទី១២ ខែមិថុនា ឆ្នាំ២០១៧ មានហេតុការណ៍ភ្ញាក់ផ្អើលមួយ និងហួសចិត្តយ៉ាងខ្លាំងខណៈ ឪពុកម្តាយក្មេកនាំគ្នាទៅដាក់ពាក្យប្តឹងចោទប្រកាន់ថា កូនប្រសាររបស់គាត់បានគាស់លួចយកទ្រព្យសម្បត្តិរបស់គាត់ អស់យ៉ាងច្រើនសន្ធឹកសន្ធាប់ ។

ជនរងគ្រោះឈ្មោះ រឹម លាប អាយុ៦៤ឆ្នាំ និងប្រពន្ធឈ្មោះ ហ៊ុន យឹន អាយុ៥៨ឆ្នាំ មានទីលំនៅក្នុងភូមិស្វាយអន្ទរទី១ ឃុំស្វាយអន្ទរ ស្រុកស្វាយអន្ទរ ខេត្តព្រៃវែង បានអះអាងថា កូនប្រសារប្រុសរបស់គាត់ឈ្មោះ ពូន ធឿន ហៅ ធី អាយុ២៨ឆ្នាំ បានលួចយកមាសរបស់គាត់អស់ខណៈពេលដែលពួកគាត់ និងកូនស្រីនាំគ្នាទៅវាលស្រែអស់ ។ លោកពូបន្ដថា ចំពោះទ្រព្យសម្បត្តិដែលបាត់បង់រួមមាន៖ មាស៤ដំឡឹង២ជីកន្លះ ផ្លាកទីន៨ហ៊ុន លុយ៥០ម៉ឺនរៀល និងម៉ូតូ១គ្រឿង។ រហូតមកទល់ពេលនេះពួកគាត់មិនអាចទាក់ទងកូនប្រសារនោះបានទេ ព្រោះទូរស័ព្ទរបស់គេបានបិទអស់ទៅហើយ ចំណែកឪពុកម្តាយខាងប្រុសក៏អះអាងថា មិនដឹងមិនឃើញដែរ ។

តាមការអះអាងពីស្ត្រីឈ្មោះ លាប ចន្ថា ដែលជាប្រពន្ធជនសង្ស័យ និងត្រូវជាកូនស្រីជនរងគ្រោះ ក៏អះអាងដូចគ្នាដែរថា ប្តីរបស់ខ្លួនគឺជាចោរដែលលួចទ្រព្យសម្បត្តិម្តាយតែម្តង ព្រោះមានអ្នកជិតខាងឃើញថាប្តីរបស់ខ្លួនជាអ្នកជិះម៉ូតូម្តាយចេញពីផ្ទះទៅ ។

ចំពោះករណីនេះត្រូវបានលោកមេប៉ូស្តិ៍រដ្ឋបាលឃុំស្វាយអន្ទរ ប្រាប់ឲ្យដឹងថា ក្រោយពីទទួលបានពាក្យបណ្តឹងជនរងគ្រោះភ្លាម កម្លាំងរបស់លោកក៏បានចុះទៅស្រាវជ្រាវភ្លាម ហើយពិនិត្យឃើញថា ជនសង្ស័យជាកូនប្រសាប្រុសនោះ ពិតជាបាត់ខ្លួនមែន ហើយកាលពីល្ងាចមុនពេលបាត់ខ្លួននោះ រូបគេនិងប្រពន្ធបានឈ្លោះទាស់ទែងគ្នាដែរ តែមិនបានវែងឆ្ងាយធំដុំអ្វីទេ ។ចំពោះរឿងលុយកាក់មាសប្រាក់ដែលជនរងគ្រោះបាត់នោះកម្លាំងសមត្ថកិច្ចកំពុងតែបន្តស្រាវជ្រាវ ៕