អតីតអ្នកប្រដាល់ជើងខ្លាំង អេ ភូថង នឹងឡើងសង្វៀនជាថ្មីនៅថ្ងៃទី៤ ខែមិថុនា ខាងមុខនេះដើម្បីរកប្រាក់ជួយដល់មន្ទីរពេទ្យកុមារគន្ធបុប្ផា។
លោក អេ ភូថង អតីតអ្នកប្រដាល់ល្បីឈ្មោះបាននិយាយឲ្យដឹងថា នៅខែក្រោយនេះលោកនឹងឡើងប្រកួតមិត្តភាពអន្តរជាតិជាមួយកីឡាករជើងខ្លាំងថៃ។ ចំពោះសមាសភាពដៃគូនោះលោកនៅមិនទាន់ដឹងនោះទេ។ សម្រាប់ការប្រកួតនេះលោកនឹងទាត់ឲ្យបានច្រើនឲ្យអស់ពីសមត្ថភាពបំផុត។ «និយាយទៅទាត់ដាច់ជើងចោល»។
ការប្រកួតនៅខែក្រោយនេះដែរ លោកនឹងខំប្រឹងប្រែងប្រកួតឲ្យអស់ពីសមត្ថភាព។ បច្ចុប្បន្នលោកកំពុងហ្វឹកហាត់ត្រៀមយ៉ាងសកម្ម ជាពិសេសគឺហាត់យកកម្លាំងតែម្ដង ព្រោះវ័យចាស់ទៅហើយ។ បើមិនហាត់យកកម្លាំងឲ្យខ្លាំងទេមិនអាចប្រកួតបានឡើយ។ ចំពោះប្រាក់តម្លៃខ្លួនប្រកួតពាក់កណ្ដាលរបស់លោកនឹងបរិចាកទៅឲ្យមន្ទីរពេទ្យ គន្ធបុប្ផាដើម្បីជួយកុមារ។
អាជ្ញាកណ្ដាលវ័យ៤៣ឆ្នាំរូបនេះបន្ថែមទៀតថា ក្រៅពីតម្លៃខ្លួនដែលផ្តល់ទៅឲ្យមន្ទីរពេទ្យគន្ធបុប្ផានោះ ការប្រកួតរបស់លោកនេះក៏ជាការជំរុញទឹកចិត្តដល់ក្មេងៗជំនាន់ក្រោយឲ្យយកចិត្តទុកដាក់ និងងាកមកលេងកីឡាទាំងអស់គ្នា ព្រោះកីឡាធ្វើឲ្យមនុស្សគ្រប់គ្នាមានសុខភាពល្អ បើទោះជាមានអាយុច្រើនក៏ដោយ។
លោក អេ ភូថង ជាគ្រូប្រដាល់គុនខ្មែរជម្រើសជាតិកម្ពុជា ដែលកំពុងបង្ហាត់សិស្សដើម្បីត្រៀមចេញទៅប្រកួតស៊ីហ្កេមនៅប្រទេសម៉ាឡេស៊ីខាងមុខនេះ។ អតីតកីឡាករជើងខ្លាំងរូបនេះនឹងត្រូវឡើងប្រកួតនៅថ្ងៃទី៤ ខែមិថុនា ឆ្នាំ២០១៧ជាមួយកីឡាករថៃនៅសង្វៀន PNN៕
