ខុសពីប្រទេសមួយចំនួន លើលោក ដែលប្រធានាធិបតីមានអំណាចលើកងទ័ព នៅអ៊ីរ៉ង់ លោកប្រធានាធិបតី ហាសាន់ រូហានីទើបរងការរិះគន់ពីក្រុមយោធា ដែលបានព្រមានលោកកុំឲ្យលូកដៃ អន្តរាគម នៅក្នុងសំណុំរឿងកងទ័ព និងការពារជាតិអ៊ីរ៉ង់។
នៅអ៊ីរ៉ង់ ប្រធានាធិបតី និងឆ្មាំការពារបដិវត្តដែលជាកងទ័ពជាន់ខ្ពស់របស់អ៊ីរ៉ង់ គឺជាស្ថាប័នមានអំណាចពីរដាច់ដោយឡែកពីគ្នា។
ជាក់ស្តែង នៅថ្ងៃសៅរ៍ម្សិលមិញ លោកមេបញ្ជាការMassoud Jazayeriអ្នកនាំពាក្យរបស់កងទ័ពអ៊ីរ៉ង់បានចេញមុខរិះគន់លោកប្រធានាធិបតី ហាសាន់ រ៉ូហានី បន្ទាប់ពីលោករ៉ូហានីលើកនិយាយពីកម្មវិធីមីស៊ីលបាលីស្ទីករបស់អ៊ីរ៉ង់ នៅក្នុងកម្មវិធីទូរទស្សន៍ សួរដេញដោលបេក្ខជនប្រធានាធិបតីអ៊ីរ៉ង់។
“យើងអំពាវនាវជាថ្មី កុំឲ្យបេក្ខជនប្រធានាធិបតីលូកដៃអន្តរាគម ក្នុងកិច្ចការកងទ័ព ហើយនិងការពារជាតិ។”
នេះជាប្រសាសន៍របស់អ្នកនាំពាក្យរបស់កងទ័ពជាតិអ៊ីរ៉ង់ ដែលមិនបាននិយាយចំៗឈ្មោះរបស់ហាសាន់ រ៉ូហានី។
នៅថ្ងៃសុក្រ លោកប្រធានាធិបតីហាសាន់ រ៉ូហានី មកពីក្រុមកំណែទម្រង់អ៊ីរ៉ង់ ដែលឈរឈ្មោះ សម្រាប់អាណត្តិទី២ បានចោទប្រកាន់ក្រុមអភិរក្សនិយមអ៊ីរ៉ង់ថា បានប៉ុនប៉ង ចង់បំផ្លាញកិច្ចព្រមព្រៀងស្តីពីនុយក្លេអ៊ែរ ដែលអ៊ីរ៉ង់សម្រេចចុះបានជាមួយប្រទេសមហាអំណាចនៅខែកក្កដា ឆ្នាំ ២០១៥។
នៅក្នុងសំដីរិះគន់កងទ័ពដែលគេកម្រនឹងលឺ លោកហាសាន់ រ៉ូហានីបាននិយាយថា លោកសោកស្តាយដែលឃើញឆ្មាំការពារបដិវត្តអ៊ីរ៉ង់បង្ហាញ រូបថតស្តីពីមូលដ្ឋានក្រោមដី ដែលស្តុកមីស៊ីលបាលីស្ទីក នៅចំពេលដែលកិច្ចព្រមព្រៀង ស្តីពីនុយក្លេអ៊ែរ ត្រូវចូលជាធរមាននៅខែមករា ឆ្នាំ ២០១៦។
នៅលើមីស៊ីលនោះទៀតសោត គេបានសរសេរសារប្រឆាំងអ៊ីស្រាអែល ដែលបើតាមលោកប្រធានាធិបតី អ៊ីរ៉ង់ គឺមានបំណងបន្ទុចបង្អាក់កិច្ចព្រមព្រៀងស្តីពីនុយក្លេអ៊ែរអ៊ីរ៉ង់។
នៅថ្ងៃ សៅរ៍ អ្នកនាំពាក្យរបស់កងទ័ពអ៊ីរ៉ង់បានបញ្ជាក់ថា មូលដ្ឋានមីស៊ីលបាលីស្ទីក នៅក្រោមដី ជាតួអង្គសំខាន់ សម្រាប់ប្រឈមតទល់នឹងសត្រូវសួរពូជរបស់បដិវត្តន៍អ៊ីស្លាម របស់ប្រជាជនអ៊ីរ៉ង់។
អ៊ីរ៉ង់បាននិយាយការពារខ្លួនថា ការបាញ់សាកល្បងមីស៊ីលរបស់ខ្លួនគ្មានត្រូវបានចែង ហាម នៅក្នុងកិច្ចព្រមព្រៀងស្តីពីនុយក្លេអ៊ែរ ដែលអ៊ីរ៉ង់ចុះហត្ថលេខាជាមួយប្រទេសមហាអំណាចទាំង៥នោះទេ។
ទៅតាមកិច្ចព្រមព្រៀងស្តីពីនុយក្លេអ៊ែរ អ៊ីរ៉ង់ត្រូវលះបង់ចោលមហិច្ឆតាផលិតអាវុធនុយក្លេអ៊ែរ ជាថ្នូរនឹងការលុបចោលទណ្ឌកម្មសេដ្ឋកិច្ច ដែលអាមេរិក និងសហគមន៍អន្តរជាតិបានដាក់ទៅលើអ៊ីរ៉ង់កន្លងមក។
សូមបញ្ជាក់ដែរថា នៅថ្ងៃទី ១៩ឧសភាខាងមុខ អ៊ីរ៉ង់នឹងរៀបចំការបោះឆ្នោតប្រធានាធិបតី ដែលនៅក្នុងនោះ លោកប្រធានាធិបតីអស់អាណត្តិ ហាសាន់ រ៉ូហានី នឹងប្រកួតប្រជែង ជាមួយ បេក្ខជនពីររូបពីក្រុមអភិរក្សនិយមជ្រុលអ៊ីរ៉ង់៕
ប្រភព៖http://phsaonline.info/archives/3815
