នារីរងគ្រោះឈ្មោះ ជុយ ចាន់ណា អាយុ២២ឆ្នាំ មុខរបរកម្មការិនីរោងចក្រ មានស្រុកកំណើតនៅក្នុងភូមិអូរវាយ ឃុំស្ពឺ ស្រុកចំការលើ ខេត្តកំពង់ចាម ស្នាក់នៅផ្ទះជួលកើតហេតុខាងលើ បានបាត់បង់ម៉ូតូ១គ្រឿងម៉ាកហុងដាស្កូបពី ពណ៌ស ស៊េរីឆ្នាំ២០១៦ ពាក់ស្លាកលេខភ្នំពេញ 9530 មិនចាំលេខរៀងអក្សរខាងមុខឡើយ។ ចំណែកបុរសដែលបោកនាងឈ្មោះ ពុន ចំរើន (pun chom rean) អាយុជាង២០ឆ្នាំ ជិះម៉ូតូកហុងដាឌ្រីមស១២៥ ស៊េរីឆ្នាំ២០១៣ ១គ្រឿង ។
ស្ត្រីរងគ្រោះបាននិយាយថា កន្លងមកប្រុសព្រានខាងលើតែងតែខលមកសុំស្នេហ៍ពីនាងជាបន្តបន្ទាប់ ហើយទោះបីជានាងប្រាប់ថា «អូនពិការជើងទេ កុំស្រឡាញ់អី» ប៉ុន្តែជននោះបានឆ្លើយថា «ទោះជាអូនពិការក៏បងនៅតែស្រលាញ់ដែរ»។ ហើយជននោះតែងតែខលរកនាង និងឧស្សាហ៍ជួបគ្នាជាញឹកញាប់ លុះដល់ថ្ងៃកើតហេតុពេលដែលនាងនៅក្នុងបន្ទប់ជួល ស្រាប់តែជននោះជិះម៉ូតូ១គ្រឿងរកនាងដល់បន្ទប់ជួល បន្ទាប់មកខ្ចីម៉ូតូរបស់នាងជិះដោយប្រាប់ថា ទៅរកទិញអីហូបតែមួយភ្លែតប៉ុណ្ណោះ រួចក៏ជិះគេចខ្លួននបាត់រហូតតែម្ដង។ ជននោះបានបន្សល់ទុកម៉ូតូហុងដាមួយគ្រឿង ហើយដោយសារតែមិនដឹងថា ម៉ូតូនោះគឺជាកម្មសិទ្ធិរបស់គេ ឬក៏ជាម៉ូតូដែលលួចពីកន្លែងណានោះ ទើបនាងបារម្ភខ្លាចមានការពាក់ព័ន្ធបទល្មើស ហេតុនេះបានជានាងធ្វើដំណើរទៅប្ដឹងសុំឲ្យនគរបាលប៉ុស្ដិ៍ជួយអន្តរាគមន៍តែម្ដង៕
