*(សេអ៊ូល)៖* នាពេលថ្មីៗនេះប្រទេសកូរ៉េខាងជើងបានប្រើពាក្យសម្តីខ្លាំងៗ
ទៅលើរដ្ឋាភិបាលទីក្រុងប៉េកាំង សម្រាប់ការរិះគន់ចំពោះកម្មវិធីអាវុធនុយក្លេអ៊ែរ
របស់រដ្ឋកុម្មុយនិស្តមួយនេះ ដោយរបបដឹកនាំទីក្រុងព្យុងយ៉ាងបានលើកឡើងថា ខ្លួននឹង
គ្មានថ្ងៃទៅអង្វរសុំមិត្តភាពពីសម្ព័ន្ធមិត្តដ៏យូរអង្វែងមួយនេះឡើយ។ នេះបើតាមការចេញផ្សាយដោយ
ទីភ្នាក់ងាព័ត៌មានកូរ៉េខាងត្បូង យុនហ៉ាប់ នៅព្រឹកថ្ងៃព្រហស្បតិ៍ ទី០៤ ខែឧសភា ឆ្នាំ២០១៧។
ការបញ្ចេញប្រតិកម្មបែបនេះរបស់ទីភ្នាក់ងារព័ត៌មានរដ្ឋកូរ៉េខាងជើង KCNA ត្រូវបានធ្វើ
ឡើងបន្ទាប់ពីសារព័ត៌មានរដ្ឋចិន ដែលបានចេញសេចក្តីរាយការណ៍ថា ការធ្វើតេស្ត
អាវុធនុយក្លេអ៊ែររបស់ទីក្រុងព្យុងយ៉ាង បានបង្កការគំរាមកំហែងធ្ងន់ធ្ងរដល់ផលប្រយោជន៍
ជាតិនៃប្រទេសក្បែរខាង។
KCNA បានលើកឡើងដូច្នេះថា *«សេចក្តីរាយការណ៍នោះបានអះអាងថា ប្រទេសកូរ៉េខាងជើង
បានបង្កការគំរាមកំហែងដល់សន្តិសុខ នៅតំបន់ភាគឦសានរបស់ចិន តាមរយៈពេលការធ្វើតេស្ត
អាវុធនុយក្លេអ៊ែរ នៅចម្ងាយមិនដល់ ១០០គីឡូម៉ែត្រពីព្រំប្រទល់របស់ខ្លួនជាមួយនិងប្រទេសចិន។
ជាងនេះទៅទៀតពួកគេថែមទាំងបាននិយាយមិនសមហេតុសមផលទៀតថា កូរ៉េខាងជើង ជាអ្នកដែល
បានធ្វើឲ្យស្ថានការណ៍នៅតំបន់អាស៊ីឦសានធ្លាក់ចុះដុនដាប ជាហេតុផ្តល់លេសឲ្យអាមេរិក ធ្វើការ
ចល័តសព្វាវុធទំនើបៗទៅក្នុងតំបន់បន្ថែមទៀត»*។
Loading...
សារព័ត៌មានខាងលើនេះបានគូសបញ្ជាក់បន្តថា ប្រព័ន្ធផ្សព្វផ្សាយរបស់ចិន បានអំពាវឲ្យមានការរឹត
បន្តឹងទណ្ឌកម្ម ប្រឆាំងនឹងកូរ៉េខាងជើង និងបានទុកជម្រើសឲ្យទីក្រុងព្យុងយ៉ាង ជ្រើសរើស
រវាងការទទួលរងភាពឯកកោដ៏យូរអង្វែងតទៀត និងការទទួលបានសន្តិសុខជាតិ រួមទាំងរវាង
ការកាត់ផ្តាច់ចំណងមិត្តភាពទ្វេភាគីរវាងប្រទេសទាំងពីរ ឬការលះបង់ចោលអាវុធនុយក្លេអ៊ែរ
បើសិនជាមិនចង់មានការប្រឈមមុខផ្នែកយោធាជាមួយចិនទេនោះ។
ជាការឆ្លើយតបទីភ្នាក់ងារព័ត៌មាន KCNA បានបញ្ជាក់ថា *«កូរ៉េខាងជើង នឹងគ្មានថ្ងៃ
លុតជង្គង់សុំអង្វរការបន្តរក្សាចំណងមិត្តភាពជាមួយប្រទេសចិន ដោយដាក់កម្មវិធីអាវុធនុយក្លេអ៊ែរ
ដែលមានតម្លៃស្មើជីវិតរបស់ប្រទេសទាំងមូល ទៅក្នុងហានិភ័យនោះឡើយ ទោះបីជាជាមិត្តភាព
នោះសំខាន់បែបណាក៏ដោយក្តី»*។
គួរបញ្ជាក់ថា ជាចុងក្រោយ KCNA បានព្រមានសម្ព័ន្ធដ៏យូរអង្វែង និងតែមួយគត់របស់ខ្លួន កុំឲ្យចង់សាក
ល្បងភាពអត់ធ្មត់របស់កូរ៉េខាងជើងឲ្យសោះ៕
ប្រភព freshnewsasia
