បណ្ឌិត ម៉ុង ឫទ្ធី សហប្រធាន ២០ឆ្នាំ មិនដែលទទួលប្រាក់ខែ រងតែការស្ដីបន្ទោស

ឧកញ៉ាបណ្ឌិត ម៉ុង ឫទ្ធី ដែលជាសហប្រធានក្រុមការងារកសិកម្ម កសិឧស្សាហកម្ម បានលើកឡើងនៅលើទំព័រហ្វេសប៊ុករបស់លោកថា លោកបានបម្រើការងារជាសហប្រធាននេះជាង ២០ឆ្នាំ កន្លងទៅហើយ មិនដែលទទួលបានប្រាក់ខែឬប្រាក់ចំណូលពីការងារនេះនោះទេ បានត្រឹមតែទៅអង្គុយឱ្យគេថាឱ្យស្រេចតែនឹងចិត្ត។

ការលើកឡើងដូច្នេះក៏ព្រោះតែមានអ្នកប្រើប្រាស់បណ្ដាញសង្គមហ្វេសប៊ុកមួយចំនួនបានធ្វើការរិះគន់លោកខ្លាំងៗ បន្ទាប់ពីកិច្ចប្រជុំរវាងវិស័យឯកជន ជាមួយនឹងរដ្ឋមន្ត្រីក្រសួងកសិកម្ម និងស្ថាប័នពាក់ព័ន្ធពុំទទួលដំណោះស្រាយសមស្របណាមួយសម្រាប់ប្រជាកសិករ។
លោកឧកញ៉ាបានបន្តពន្យល់ថា "ពូសុំអភ័យទោសដែលមិនអាចជួយដល់អ្នកទាំងអស់គ្នាបាន ពូដឹងហើយថាមិនមែនតែកសិករខ្នាតតូច មធ្យមទេដែលត្រូវដួលរលំ សហគ្រាសខ្នាតធំក៏ត្រូវតែដួលរលំដែរ បើលក់ជ្រូកមួយក្បាលខាតពី ៣០-៥០ដុល្លារ ទៅហើយនោះ កសិករដែលជាអ្នកដាំដំឡូងមី ពោត សណ្ដែក ស្រូវដែលធ្លាប់តែដឹកកសិផលរបស់ខ្លួនយកមកលក់ឱ្យរោងចក្រផលិតចំណីសត្វ ក៏ត្រូវប្រឈមនឹងអត់មានអ្នកទិញដែរ បើរោងចក្រត្រូវបិទទ្វារទៅហើយនោះ" ។
ឧកញ៉ា ម៉ុង ឫទ្ធី ក្នុងនាមជាសហប្រធានក្រុមការងារកសិកម្ម កសិឧស្សាហកម្ម បានដឹកនាំវិស័យឯកជនជួបប្រជុំរកដំណោះស្រាយជាមួយរដ្ឋមន្ត្រីក្រសួងកសិកម្ម និងស្ថាប័នពាក់ព័ន្ធកាលពីថ្ងៃទី១៦ ឧសភា កន្លងទៅ ប៉ុន្តែកិច្ចប្រជុំត្រូវបានបិទបញ្ចប់ដោយគ្មានដំណោះស្រាយសមស្របណាមួយជូនប្រជាកសិករនោះទេ៕