រាជធានីភ្នំពេញ ៖ ក្រោយពីដឹងថា កូនប្រុសបានក្លាយជាជនកាចសាហាវ និងដាច់ចិត្តសម្លាប់ប្រពន្ធក្រោយរបស់ឪពុកខ្លួនឯងនោះ ត្រូវអ្នកនាងឃ្មិប ជាម្តាយបង្កើតបានសម្តែងនូវការភ្ញាក់ផ្អើល ដែលកូនកាលនៅដៃនាង ជាក្មេងល្អម្នាក់ ។ ប៉ុន្តែក្រោយបែកខ្ញែកគ្នាទៅជាមួយប្តី (ហុងដា) បែរក្លាយទៅជាសភាពមួយផ្សេងទៅវិញ។
ក្នុងពេលដែលកូនប្រុសនាយហុងដា បានក្លាយជាឃាតករសម្លាប់ប្រពន្ធក្រោយនាយហុងដានោះ អ្នកនាងឃ្មិបដែលទើបតែដឹងរឿងនិងធ្លាក់ខ្លួនស៊ីឈ្មួលគេកើបស្រូវ បេះបន្លែនៅបន្ទាយមានជ័យ ហាក់សម្តែងការអាក់អន់ចិត្តចំពោះនាយហុងដាទៅវិញ ដែលជម្រះយកកូនទៅចិញ្ចឹម បែរជាមើលថែមិនល្អ រហូតផ្ទុះរឿងរ៉ាវក្លាយជាជនញៀនថ្នាំ និងជនអគតិប្រើកាយវិការសម្លាប់គេ។
អ្នកនាងរ៉េន សុធារី (ហៅឃ្មិប) បានខំប្រមែប្រមូលកម្លាំងដើរខ្ចីលុយគេពីខេត្តបន្ទាយមានជ័យ មកភ្នំពេញបាន៥០០បាត ដើម្បីធ្វើជាសោហុយចាយវាយក្នុងរាជធានីភ្នំពេញ និងទៅមើលកូនប្រុស ដែលបានក្លាយខ្លួនជាឃាតករ ។ អ្នកនាងឃ្មិប ដែលពេលនេះក្លាយជាស្ត្រីមេម៉ាយសារជាថ្មី ក្រោយលែងលះប្តីទី២ និងអះអាងថា មានកូនស្រីម្នាក់អាយុ២ឆ្នាំ បានសារភាពនូវអាថ៌កំបាំងជាច្រើន ក្រោយបាត់មុខពីសិល្បៈ ដើម្បីគេចចេញពីបណ្តាញសារព័ត៌មានមួយចំនួន វាយបកនូវរឿងអាស្រូវផ្សេងៗមកលើនាង ។
អ្នកនាងឃ្មិប ដែលមានមុខជាំ ប្រែជាមនុស្សមើលមិនស្គាល់ស្បែកខ្មៅ បានបង្ហាញការភ្ញាក់ផ្អើលក្រោយដឹងថា កូនប្រុសនាងត្រូវសង្គមមិនឱ្យតម្លៃដោយនាងនិយាយថា កូនប្រុសនាងត្រូវបាននាយហុងដាអះអាងថា យកទៅចិញ្ចឹមមិនឲ្យនាងយកទៅចិញ្ចឹមឡើយតាំងពីលែងគ្នា ។ កូនប្រុសដែលក្លាយជាឃាតកនោះ កាលពីតូចគឺរៀនពូកែ និងស្តាប់បង្គាប់ឪពុកម្តាយ តែដល់បែកពីនាងរាប់ខែឆ្នាំបែរជាធ្លាក់ខ្លួនទៅជារឿងបែបនេះ នាងពិតជាភ្ញាក់ផ្អើលមិននឹកស្មានឡើយ ។
ការត្រឡប់មកភ្នំពេញនេះ គឺបំណងចង់មកមើលកូនប្រុសរបស់នាងដែលមានរឿង ខណៈដែលទើបតែដឹង ។ នាងនៅស្រុកបន្ទាយមានជ័យ ក៏ព្រោះតែមិនចង់នៅភ្នំពេញ ស្របពេលដែលនាងត្រូវគេចោទថា យកប្តីគេ យកប្តីឯកឧត្តម ឬប្តីនៅអាមេរិក ទៅនៅទីនោះដែលធាតុពិតនាងទៅបន្ទាយមានជ័យ នៅជាមួយលោកឪពុកជីវ៉ាន់ស៊ុយ ហើយបួនឆ្នាំក្រោយបានជ្រើសយកប្តីមួយទៀត កុំឲ្យគេថាយើងជាស្ត្រីនៅម្នាក់ឯង គេមើលងាយដោយមិនមែនផិតក្បត់ស្វាមីរត់ចោលនោះទេ ។
នាងសារភាពទៀតថា នាងលែងលះគ្នា រហូតខំដាច់ចិត្តឲ្យកូនទៅនៅជាមួយហុងដា ដោយសារតែលោកហុងដាគាត់ញៀនល្បែងនិងស្រី ព្រោះនាងបាននិយាយរួចហើយថា ឲ្យខំរកលុយទិញដីធ្វើផ្ទះ ឬទិញផ្ទះទុក ដើម្បីជ្រកកុំឲ្យជួលគេហើយស្រីមានៗទៅតែស៊ីហើយឲ្យលុយទៅតែបំណងនេះ មិនបានសម្រេចនោះទេ ទើបនាងឈប់និយាយ និងលែងលះគ្នាតែម្តង។ អតីតតារាកំប្លែងក្រុយនាយកុយរូបនេះលើកឡើងទៀតថាខ្លួនបានមកភ្នំពេញច្រៀងផងទៅមើលលោកឪពុកឈឺផងនៅពេទ្យកេតុមាលារហូតទាល់តែគាត់លាចាកនាងបានទៅនៅបន្ទាយមានជ័យវិញសុខចិត្តទៅធ្វើស្រែបេះបន្លែលក់រាវខ្យងខ្ចៅដើម្បីបិទរឿងរ៉ាវមិនឲ្យគេដឹងឡើយ។
យ៉ាងណាមិញ នាងមានបំណងចង់មកជួបកូននៅក្នុងពន្ធនាគារ ចង់ផ្តាំពាក្យពេជ្រល្អៗខ្លះដល់កូន ដើម្បីធ្វើជាមនុស្សតាំងចិត្តជាកុសល កុំគិតច្រើនដឹងខុសត្រូវកែ ។ តារាកំប្លែងអភ័ព្វនេះ បានលើកដៃអំពាវនាវដល់មហាជនសម្តេចឯកឧត្តម មេត្តាជួយដល់រូបនាងនិងលោកពូរបស់នាង និងម្តាយមីងនាងនៅបន្ទាយមានជ័យ ដែលក្រនៅខ្ទមគ្មានភ្លើងអគ្គិសនីប្រើនោះទេ មានតែពិលតូចមួយប៉ុណ្ណោះ ។
យ៉ាងណា គេនៅមិនទាន់ដឹងថា នាយហុងដាមានប្រតិកម្មបែបណានោះទេ ជុំវិញរឿងដែលនាងឃ្មិប បានបរិយាយរឿងពាក់ព័ន្ធនិងស្នេហាអតីតកាល និងរំលឹករឿងអតីតកាលនាពេលនេះ ខណៈដែលលោកកំពុងតែខូចចិត្តប្រពន្ធ ក្រោយចាកចេញគ្មានវិលវិញនិងកំពុងធ្វើបុណ្យ៧ថ្ងៃ ។
