ក្រុងការ៉ាកាសៈ រដ្ឋមន្ត្រីការពារជាតិប្រទេសវេណេស៊ុយអេឡា កាលពីថ្ងៃចន្ទបានប្រកាសពីភក្តីភាពរបស់កងទ័ពចំពោះប្រធានាធិបតីលោក នីកូឡាស់ ម៉ាឌូរ៉ូ ដែលបានបញ្ជាឲ្យទាហានទាំងអស់ចុះទៅតាមដងផ្លូវនានាមុនពេលបាតុកម្មទ្រង់ទ្រាយធំមួយត្រូវបានធ្វើឡើងដោយក្រុមអ្នកប្រឆាំងដែលព្យាយាមបណ្តេញលោកចេញពីតំណែង។
វ៉េណេស៊ុយអេឡា កំពុងត្រៀមរួចជាស្រេចសម្រាប់អ្វីដែលក្រុមអ្នកប្រឆាំងនឹងលោក ម៉ាឌូរ៉ូ ប្តេជ្ញាថានឹងធ្វើជាមាតានៃការតវ៉ាទាំងអស់កាលពីថ្ងៃពុធ បន្ទាប់ពីការប៉ះទង្គិចគ្នាពីរសប្តាហ៍រវាងកងកម្លាំងប៉ូលិស និងក្រុមអ្នកតវ៉ាចំពោះវិធានការនានារបស់មេដឹកនាំឆ្វេងនិយម និងក្រុមសម្ព័ន្ធមិត្តរបស់ខ្លួនដើម្បីក្តោបក្តាប់អំណាចរបស់ពួកគេ។
ក្រុមអ្នកប្រឆាំងនិយមស្តាំកណ្តាលបានអំពាវនាវសុំឲ្យកងទ័ពទាំងអស់ដែលជាសសរស្តម្ភនៃអំណាចដ៏រឹងមាំរបស់ លោក ម៉ាឌូរ៉ូ ធ្វើការប្រឆាំងប្រធានាធិបតីរូបនេះ ខណៈវិបត្តិសេដ្ឋកិច្ច និងនយោបាយដែលបានបង្កឲ្យមានកង្វះស្បៀងអាហារយ៉ាងខ្លាំងអំពើកុបកម្ម និងអំពើលួចប្លន់នៅក្នុងប្រទេសនេះជាដើម។
ប៉ុន្តែ រដ្ឋមន្ត្រីការពារជាតិ លោក Vladimir Padrino Lopez បាននិយាយថាកងទ័ពបានអះអាងបញ្ជាក់ពីភក្តីភាពរបស់ពួកគេដោយឥតលក្ខខណ្ឌចំពោះលោក នីកូឡះ ម៉ាឌូរ៉ូ៕
ប្រភព៖ ភ្នំពេញប៉ុស្តិ៍
