ខណៈដែលកងទ័ពជើងទឹកអាមេរិកបញ្ជូនចេញនូវក្រុមនាវាចម្បាំងឆ្ពោះទៅមហាសមុទ្រប៉ាស៊ីហ្វិកខាងលិច ដើម្បីឱ្យមានវត្តមានក្បែរឧបទ្វីបកូរ៉េ រដ្ឋមន្ត្រីការបរទេសអាមេរិក រិច ធីលល័សុន និយាយកាលពីថ្ងៃអាទិត្យ ទី៩ មេសាថា ចិនយល់ព្រមជាមួយរដ្ឋការដូណាល់ត្រាំថា “ត្រូវតែធ្វើចំណាត់ការ” ទាក់ទិនកូរ៉េខាងជើង។ នេះបើតាមប្រភពព័ត៌មាន The Guardian។
លោកធីលល័រសុនបានប្រាប់នៅកម្មវិធី Face the Nation របស់ទូរទស្សន៍ CBS ក្នុងកិច្ចសម្ភាសន៍ផ្សាយផ្ទាល់កាលពីថ្ងៃអាទិត្យថា នៅពេល ដូណាល់ ត្រាំ និង ប្រធានាធិបតីចិន ស៊ី ជីនពីង ជួបគ្នានៅរមណីយដ្ឋាន Mar-a-Lago សប្តាហ៍នេះ ពួកគេ “បានពិភាក្សាគ្នាយ៉ាងទូលំទូលាយ ជុំវិញស្ថានភាពគ្រោះថ្នាក់នៅក្នុងកូរ៉េខាងជើង”។
លោកធីលល័រសុននិយាយថា “ប្រធានាធិបតីស៊ី យល់ច្បាស់រឿងនេះ ហើយខ្ញុំយល់ថាគាត់យល់ស្របថា ស្ថានភាពសព្វថ្ងៃកាន់តែតានតឹងខ្លាំង ហើយឈានដល់កម្រិតនៃការគំរាមកំហែងមួយ ដែលត្រូវតែធ្វើចំណាត់ការ”។
លោកធីលល័រសុនពណ៌នាថា “ទស្សនៈរួម និង ការមិនខ្វែងគំនិតគ្នា (រវាងត្រាំនិងស៊ី ជីនពីង) គឺឆ្លុះបញ្ចាំងឱ្យឃើញថាពួកគេព្រួយបារម្ភកម្រិតណាចំពោះស្ថានភាពដ៏គ្រោះថ្នាក់នៅកូរ៉េខាងជើង”។
ក្នុងទស្សនៈនៃការគំរាមកំហែងមកលើតំបន់ ដែលបង្កឡើងដោយការសាកល្បងមីស៊ីល និង មហិច្ឆតានុយក្លេអ៊ែរកូរ៉េខាងជើង លោកធីលល័រសុននិយាយថា ចិន “មិនជឿថា ស្ថានការណ៍មានលក្ខណៈអំណោយផលឡើយក្នុងពេលបច្ចុប្បន្នដើម្បីចូលរួមក្នុងការពិភាក្សាជាមួយរដ្ឋាភិបាលក្នុងក្រុងព្យុងយ៉ាង”។
លោកធីលល័រសុនបន្ថែមថា “យើងសង្ឃឹមថា យើងអាចធ្វើការជាមួយចិន ដើម្បីផ្លាស់ប្តូរស្ថានការណ៍ ក្នុងគំនិតរបស់ថ្នាក់ដឹកនាំកូរ៉េខាងជើង។ ហើយក្រោយមក ពេលទៅដល់ចំណុចនោះ ប្រហែលការពិភាក្សា (ជាមួយកូរ៉េខាងជើង) អាចមានប្រយោជន៍”។
លោកបន្តថា “ប៉ុន្តែខ្ញុំគិតថា គឺមានទស្សនៈរួមគ្នា និង គ្មានការខ្វែងគំនិតគ្នាឡើយចំពោះថាតើស្ថានភាពបច្ចុប្បន្នមានគ្រោះថ្នាក់កម្រិតយ៉ាណានោះ។ ខ្ញុំគិតថា សូម្បីចិនក៏កំពុងចាប់ផ្តើមទទួលស្គាល់ថា ស្ថានភាពនេះ (ការសាកល្បងមីស៊ីលឥតស្រាកស្រាន្ត) បង្កការគំរាមកំហែងដល់ផលប្រយោជន៍ចិនផងដែរ”។
គួររំលឹកថា ក្រោយកិច្ចប្រជុំកំពូលរវាងលោកត្រាំ និងលោកស៊ីនៅថ្ងៃសុក្រ ក្រុមនាវាចម្បាំង Carl Vinson ដែលមាននាវាផ្ទុកយន្តហោះមួយគ្រឿងផងនោះ បានចាកចេញពីសិង្ហបុរីឆ្ពោះទៅក្បែរឧបទ្វីបកូរ៉េនៅមហាសមុទ្រប៉ាស៊ីហ្វិកខាងលិចនៅថ្ងៃសៅរ៍៕
