ល្អណាស់...! ធនាគារពិភពលោកផ្តល់១០០លានដុល្លារ ដល់កម្ពុជាដើម្បី... ជួយស៊ែ ឲ្យប្រជាជនខ្មែរបានដឹងផង (សូមអាន)

ថវិកា១០០លានដុល្លារអាមេរិក ដែលក្រុមប្រឹក្សានាយកប្រតិបត្តិនៃធនាគារពិភពលោក (World Bank) បានអនុម័តសម្រាប់ផ្តល់ឲ្យកម្ពុជានេះ គឺបានបែងចែកទៅលើគម្រោងចំនួនពីរ។

គម្រោងទាំងពីរនេះ គឺបានបញ្ជាក់នៅក្នុងសេចក្តីប្រកាសរបស់ធនាគារពិភពលោក កាលពីថ្ងៃសុក្រ ឱ្យដឹងថា ថវិកា៤០លានដុល្លារនឹងផ្តល់សម្រាប់លើកកម្ពស់វិស័យអប់រំនៅអនុវិទ្យាល័យមានរយៈពេល ៥ឆ្នាំ ដោយធ្វើការពង្រឹងការគ្រប់គ្រងរបស់សាលា និងលើកកម្ពស់គុណភាពគ្រូបង្រៀន ពិសេសលើមុខវិជ្ជាគណិតវិទ្យា រូបវិទ្យា ជីវវិទ្យា គីមីវិទ្យា អក្សរសាស្ត្រខ្មែរ និងប្រវត្តិវិទ្យា។

ចំណែក ថវិកា៦០លានដុល្លារទៀត នឹងផ្តល់ទៅលើការស្ថាបនាឡើងវិញនៃផ្លូវជនបទប្រវែង ២៥០គីឡូម៉ែត្រក្នុងខេត្តចំនួន៦ តាមដងទន្លេមេគង្គ និងទន្លេសាប រួមមានខេត្តស្ទឹងត្រែង ក្រចេះ កំពង់ចាម ត្បូងឃ្មុំ សៀមរាប និងខេត្តកណ្តាល។ គម្រោងស្ថាបនាផ្លូវជនបទនេះ ធនាគារពិភពលោកបញ្ជាក់ថា ដើម្បីធ្វើឲ្យប្រសើរឡើងដែលអាចទប់ទល់នឹងគ្រោះទឹកជំនន់ និងបញ្ចៀសការចំណាយខ្ពស់លើការសាងសង់ដដែលៗ។

នៅក្នុងសេចក្តីប្រកាសរបស់ធនាគារពិភពលោកដដែល បានគូសបញ្ជាក់ថា កាលពីឆ្នាំមុន ៧០ភាគរយនៃសាលារៀនដែលសាងសង់ដោយក្រសួងអប់រំ និងធនាគារពិភពលោកបានជួបប្រទះការខ្វះខាតបន្ទប់ និងបន្ទប់មានភាពតូចចង្អៀត។ ហើយភាគច្រើននៃសាលារៀនទាំងនោះមិនមានគ្រូគ្រប់គ្រាន់ ថែមទាំងបន្ទប់រៀនមានសិស្សហួសចំណុះជាដើម។

ដោយឡែក ចំពោះផ្លូវជនបទនានាវិញ ធនាគារពិភពលោកបានវាយតម្លៃកាលពីចុងឆ្នាំ២០១៦ថា ជាង ៨០ភាគរយ មិនទាន់ចាក់កៅស៊ូដែលបណ្តាលឱ្យមានបញ្ហាជាខ្លាំងក្នុងអំឡុងពេលរដូវវស្សា ដោយសារតែមានការបំផ្លាញផ្លូវថ្នល់ និងការចំណាយលើការគ្រប់គ្រងខ្ពស់៕