ក្រោយពីនោះមិនយូរប៉ុន្មាន មិត្តភ័ក្ដិខ្ញុំក៏បានរៀបការម្ដងទៀតជាមួយនារីម្នាក់ទៀតដែលស្រស់ស្អាត និងមានអត្តចរិតល្អជាងប្រពន្ធមុន។ អាចថាដោយសារគេមិនទាន់មានកូនឲ្យជាប់ចំណង ទើបសម្រេចរៀបការបានងាយឆាប់ដូច្នេះ។ នៅពេលនោះគេមានអារម្មណ៍ថា ប្រពន្ធថ្មីនេះហើយទើបជាមនុស្សស្រីក្នុងសុបិន ដែលអាចមកបំពេញអត្ថន័យសម្រាប់ជីវិតរបស់គេ ហើយគេជឿជាក់ថានាងអាចរស់នៅជាមួយគេចុះសម្រុងជាងប្រពន្ធមុនយ៉ាងពិតប្រាកដ។
បន្ទាប់ពីមិត្តខ្ញុំនិងប្រពន្ធថ្មីគេបានរៀបការ មិនយូរប៉ុន្មាន រឿងរ៉ាវដែលមើលទៅហាក់ដូចជាកាន់តែល្អ ក៏ត្រលប់ក្លាយជាដូចមុន។ បន្ទាប់ពីពួកគេទាំងពីររស់នៅជាមួយគ្នាមួយរយៈធំ គ្រួសាររបស់គេក៏ចាប់ផ្ដើមមានរឿងដូចជាកាលដែលគេរស់នៅជាមួយប្រពន្ធមុន។ អ្នកទាំងពីរឈ្លោះគ្នាមិនលោះថ្ងៃ ការងារផ្ទះ ចង្ក្រានជើងឆ្នាំង ប្រពន្ធរបស់គេក៏ចាប់ផ្ដើមមិនរវីរវល់។ ពេលនោះមិត្តខ្ញុំវាចេះតែគិតថា កម្មពៀរអីវា រៀបការប្រពន្ធថ្មីទៅហើយ តែយូរៗទៅជួបរឿងដដែល!
រហូតដល់ថ្ងៃមួយ ទាំងមិត្តរបស់ខ្ញុំនិងប្រពន្ធមុនរបស់គេ បានមានឱកាសជួបគ្នានៅពិធីជប់លៀងមួយ។ អតីតប្រពន្ធរបស់គេក៏បានរៀបការប្ដីថ្មីហើយដូចគ្នា ហើយថ្ងៃនោះពួកគេបានមកចូលរួមជាមួយគ្នាដែរ។ មិត្តខ្ញុំក៏មិនបានមានអារម្មណ៍ប្រចែប្រចណ្ឌអ្វី ប៉ុន្តែវាក៏លួចឆ្ងល់ថាហេតុអ្វីមនុស្សស្រីចរិតឆេវឆាវ និងអាត្មានិយមដូចជាប្រពន្ធដើមរបស់គេ មានបុរសមកស្រឡាញ់ទៀត។ គេបានត្រឹមតែលួចនិយាយចំអក ថាសមមុខ សម្រាប់បុរសដែលជាស្វាមីថ្មីរបស់នាងពីចម្ងាយ។
ប៉ុន្តែរូបភាពដែលខ្ញុំបានឃើញ មិនដូចជាអ្វីដែលមិត្តខ្ញុំគិតនោះទេ។ ខ្ញុំឃើញស្វាមីថ្មីរបស់នាង ហាក់ដូចជាមានមោទនភាពនឹងប្រពន្ធរបស់គេខ្លាំងណាស់។ មិនតែប៉ុណ្ណោះ ខ្ញុំថែមទាំងបានឮស្វាមីថ្មីរបស់ប្រពន្ធដើមមិត្តខ្ញុំនិយាយសរសើរនាងមិនដាច់ពីមាត់ ដូចជា៖ "ប្រពន្ធខ្ញុំគួរឲ្យស្រឡាញ់ណាស់ នាងជាមនុស្សស្រីល្អមែនទែន... ខ្ញុំមិនដែលគិតថាខ្លួនឯង មានសំណាងបានប្រពន្ធល្អដូចជានាងទេ ហើយនាងថែមទាំងមើលថែពុកម៉ែខ្ញុំបានយ៉ាងល្អទៀតផង... មនុស្សស្រីដូចជានាង មិនងាយនឹងរកបានទេ ប៉ុន្តែខ្ញុំសំណាងណាស់ដែលបាននាងមកធ្វើជាគូជីវិត"។ ខ្ញុំយកពាក្យទាំងនេះមកនិយាយឲ្យមិត្តខ្ញុំស្ដាប់ វាក៏មិនជឿសូម្បីបន្តិច ថែមទាំងនិយាយទៀតថា "មនុស្សស្រីដូចនាងហ្នឹងល្អ?” ហើយវាថាខ្ញុំហ្នឹងកុហកវាទាំងរស់!
បន្ទាប់ពីថ្ងៃនោះ មិនបានយូរប៉ុន្មាន មិត្តខ្ញុំក៏បានជួបអតីតប្រពន្ធរបស់គេជាមួយស្វាមីថ្មីនាងម្ដងទៀតដោយចៃដន្យ។ អ្នកទាំងពីរកំពុងដើររើសមើលទិញឥវ៉ាន់ក្នុងផ្សារទំនើប។ មិត្តខ្ញុំនិយាយឲ្យខ្ញុំស្ដាប់ថា គេបានលួចមើលអ្នកទាំងពីរពីចម្ងាយ ហើយក៏អាចយល់បានថាពួកគេមានក្ដីសុខជាមួយគ្នាណាស់។ ស្នាមញញឹមប្រពន្ធមុនរបស់គេមើលទៅពោរពេញដោយសេចក្ដីសុខ ហើយគេក៏អាចមើលឃើញពីកាយវិការដ៏កក់ក្ដៅចេញពីស្វាមីថ្មីរបស់នាង។
មិត្តខ្ញុំសឹងតែមិនជឿភ្នែករបស់ខ្លួនឡើយ ថាមនុស្សស្រីដែលធ្លាប់តែនិយាយគ្រោតគ្រាត និងអាត្មានិយមពេលនេះប្រែក្លាយជា "ទេពធីតា" ផ្ទុយស្រឡះពីអ្វីដែលគេធ្លាប់គិត។ រហូតថ្ងៃមួយ ខ្ញុំក៏មានឱកាសបានជួបប្រពន្ធដើមរបស់គេ ទើបខ្ញុំធ្វើជាសួរសុខទុក្ខនាង នាងក៏និយាយឲ្យខ្ញុំស្ដាប់ដោយខ្សែភ្នែកពោរពេញដោយសេចក្ដីសុខពិតប្រាកដមែន។ នាងនិយាយថា នាងរីករាយជាមួយជីវិតថ្មីនេះណាស់ ព្រោះទាំងប្ដីរបស់នាង និងគ្រួសាររបស់គេ សុទ្ធតែល្អជាមួយនាង។
ត្រឹមតែប៉ុណ្ណេះខ្ញុំក៏យល់បានគ្រប់យ៉ាង... ប្រពន្ធមិត្តខ្ញុំទាំងមុន និងក្រោយ គឺមិនបានឆេវឆាវ ឬអាត្មានិយមដូចជាអ្វីដែលវានិយាយទេ។ រឿងទាំងអស់កើតឡើង គឺដោយសារមិត្តខ្ញុំទៅវិញទេ បើគេនិយាយល្អជាមួយប្រពន្ធតែបន្តិច នោះគ្មានផ្លូវដែលពួកនាងបង្ហាញចរិតមិនល្អចេញមកបែបនោះឡើយ។ ចុងក្រោយ ខ្ញុំសុំផ្ដាំផ្ញើដល់មិត្តភ័ក្ដិខ្ញុំ និងមនុស្សជាច្រើនទៀតថា "បើអ្នកត្រូវការឲ្យមនុស្សជុំវិញខ្លួនប្រព្រឹត្តយ៉ាងម៉េចជាមួយអ្នក អ្នកត្រូវប្រព្រឹត្តយ៉ាងនោះជាមួយពួកគេជាមុនសិន"។ បន្ទាប់ពីខ្ញុំបានជួបមិត្តខ្ញុំម្ដងទៀត វាក៏រអ៊ូរទាំតែរឿងប្រពន្ធថ្មីរបស់វាឲ្យខ្ញុំស្ដាប់ ឯខ្ញុំបានត្រឹមតែសួរត្រលប់ទៅវាវិញថា "ហើយឯងបានធ្វើល្អជាមួយនាងគ្រប់គ្រាន់ ហើយនៅ?” ខ្ញុំមិនដឹងថាវាយល់ពីសម្ដីខ្ញុំឬក៏អត់ទេ តែខ្ញុំគិតថាខ្ញុំព្យាយាមជួយវាខ្លាំងបំផុតហើយ...
ប្រភព៖ Liekr
ប្រែសម្រួលៈ វ៉ាន់ថន
