មនុស្សដែលស្ងាបច្រើន ការពិតជាមនុស្សវៃឆ្លាតខ្លាំង

ការសិក្សាថ្មីមួយបានរកឃើញថា ប្រវែងនៃការស្ងាបរបស់អ្នក ទាក់ទងទៅនឹង ទម្ងន់ខួរក្បាលរបស់អ្នក និងការផ្ទុកកោសិកាណឺរ៉ូន (Neurons) របស់វា។

ការស្ងាបកាន់តែយូរ បញ្ជាក់ថាទំហំខួរក្បាលកាន់តែធំ។ នេះបើយោងតាមការសិក្សា ដែលបានចុះផ្សាយនៅលើទស្សនាវដ្ដីជីវវិទ្យា Biology Letters។

(រូបតំណាង)

ការស្រាវជ្រាវបានរកឃើញថា ប្រវែងនៃការស្ងាបមួយ អាចទស្សន៍ទាយយ៉ាងត្រឹមត្រូវ ពីទំហំនៃខួរក្បាលរបស់សត្វ ហើយការរកឃើញរបស់ពួកគេ ក៏អាចយកមកអនុវត្តលើមនុស្សផងដែរ។

ក្រុមអ្នកស្រាវជ្រាវបានមើលវីដេអូ និងវាស់រយៈពេលនៃការស្ងាបរបស់មនុស្ស និងសត្វមួយចំនួន ដូចជា ឆ្មា សុនខ ស្វា Gorilla កញ្ជ្រោង អូដ្ឋ កាំប្រមា សេះ កណ្ដុរ ស្វា Chimpanzees និងសត្វដទៃជាច្រើនទៀត។ ពួកគេបានរកឃើញថា មនុស្សស្ងាបយូរបំផុត ដែលជាមធ្យមមានខួរក្បាលទម្ងន់ ៣ផោន (១,៣៦គីឡូក្រាម)។

លោក Andrew Gallup ចិត្តវិទូ និងជាផ្នែកមួយនៃក្រុមសិក្សាស្រាវជ្រាវ បានឲ្យដឹងថា យើងស្ងាបដើម្បីធ្វើឲ្យខួរក្បាលរបស់យើងត្រជាក់។

«នៅពេលអ្នកស្ងាប ថ្គាមរបស់អ្នកបង្កើនចរាចរឈាម ទៅកាន់លលាដ៍ក្បាល និងបូមឈាមក្ដៅចេញពីខួរក្បាលរបស់អ្នក។ ស្របពេលជាមួយគ្នានោះ អ្នកស្រូបយកខ្យល់ ចូលទៅក្នុងច្រមុះ និងមាត់របស់អ្នក ធ្វើឲ្យត្រជាក់សរសៃឈាមលលាដ៍ក្បាល តាមរយៈការនាំខ្យល់ចូលទៀតផង»៕