រដ្ឋមន្ត្រីក្រសួងការបរទេសចិនបានអំពាវនាវកាលពីថ្ងៃអាទិត្យទី២៣មេសាឱ្យមានការរំសាយអាវុធនុយក្លេអ៊ែរទាំងស្រុងនៅឧបទ្វីបកូរ៉េ ចំពេលដែលមានភាពតានតឹងកើនឡើងខ្លាំងអំពីមីស៊ីលនិងកម្មវិធីនុយក្លេអ៊ែររបស់កូរ៉េខាងជើង។
លោក វ៉ាង យី រដ្ឋមន្ត្រីក្រសួងការបរទេសចិន បាននិយាយប្រាប់ទីភ្នាក់ងារសារព័ត៌មាននៅទីក្រុងអាថែន ប្រទេសក្រិក បន្ទាប់ពីជំនួបពិភាក្សាជាមួយសមភាគីក្រិក លោក នីកូស កុតហ្ស៊ីអាស (Nikos Kotzias) ថា “ប្រទេសចិនគាំទ្រចំពោះការរំសាយអាវុធនុយក្លេអ៊ែរនៅតំបន់នោះ (ឧបទ្វីបកូរ៉េ) ដើម្បីស្ថិរភាពនិងសន្តិភាព។ ប្រទេសចិនមិនអាច មានគន្លឹះដំណោះស្រាយសម្រាប់ដំណោះស្រាយនេះទេ… ប៉ុន្តែយើងមានការសប្បាយចិត្តដែលភាគីច្រើនទៀតបានទទួលយកទស្សនៈរបស់យើង”។
ដោយឡែកកាលពីថ្ងៃទី២៣ ខែមេសា កន្លងទៅនេះ អនុប្រធានាធិបតីអាមេរិក លោក ម៉ៃ ផេន បានិយាយថា ការធ្វើឱ្យឧបទ្វីបកូរ៉េគ្មានអាវុធនុយក្លេអ៊ែរ អាចសម្រចបានដោយសន្តិវិធី ដោយសារការចូលពាក់ព័ន្ធជាថ្មីរបស់រដ្ឋាភិបាលក្រុងវ៉ាស៊ីនតោនជាមួយចិន បើទោះបីជាមានការភ័យខ្លាចថា កូរ៉េខាងជើងអាចសាកល្បងនុយក្លេអ៊ែរជាថ្មីក្នុងពេលឆាប់ៗនេះក៏ដោយ។
កូរ៉េខាងត្បូង កំពុងស្ថិតក្នុងការប្រុងជើងការខ្ពស់ នៅមុនការប្រារព្ធខួបដ៏សំខាន់មួយទៀតនៅកូរ៉េខាងជើង ដែលអាចនឹងមានការសាកល្បងនុយក្លេអ៊ែរថ្មីមួយ ឬបាញ់សាកល្បងមីស៊ីល ដែលនាំឱ្យមានការប្រមូលផ្តុំកងទ័ពនិងគ្រឿងសព្វាវុធនៅតាមព្រំដែន។
ប្រធានាធិបតីអាមេរិក លោក ដូណាល់ ត្រាំបានជំរុញចិនឱ្យចាត់វិធានការកាន់តែខ្លាំងក្នុងការដាក់សម្ពាធលើកូរ៉េខាងជើងដើម្បីទប់ស្កាត់កម្មវិធីនុយក្លេអ៊ែរនិងមីស៊ីលរបស់ខ្លួន។
ក្នុងកំឡុងពេលដំណើរទស្សនកិច្ចថ្នាក់តំបន់មួយកាលពីសប្តាហ៍នោះ លោក ម៉ៃ ផេន អនុប្រធានាធិបតីអាមេរិក បានព្រមានថា “ជម្រើសទាំងអស់ គឺមាននៅលើតុ” ដើម្បីទប់ស្កាត់មហិច្ឆតានុយក្លេអ៊ែររបស់កូរ៉េខាងជើង ស្របពេលដែលមានការភ័យខ្លាចថាកូរ៉េខាងជើង អាចរៀបចំសាកល្បងនុយក្លេអ៊ែរមួយសារជាថ្មី ដែលអាចនឹងធ្វើឡើងនៅថ្ងៃអង្គារទី ២៥មេសា ខាងមុខនេះ ព្យុងយ៉ាងត្រូវប្រារព្វខួប៨៥ឆ្នាំនៃការបង្កើត “កងទ័ពប្រជាមានិត”។ ក្នុងឱកាសបែបនេះ កូរ៉េខាងជើង តែងតែយកលេសអបអរថ្ងៃបុណ្យ ដើម្បីបង្ហាញអំពីសមត្ថភាពយោធា និងនុយក្លេអ៊ែររបស់ខ្លួន តាមរយៈការបាញ់សាកល្បងមីស៊ីល ឬបាញ់សាកល្បងនុយក្លេអ៊ែរជាលើកទី៦៕
