ម្ចាស់រថយន្តដឹកជ្រូកនេះឈ្មោះ ព្រំ គង់ ភេទប្រុស អាយុ៥០ឆ្នាំ រស់នៅភូមិស្អំ ឃុំក្រែក ស្រុកពញ្ញាក្រែក ខេត្តត្បូងឃ្មុំ និងម្ចាស់សត្វមិនបានស្គាល់ឈ្មោះ។
លោក ហ៊ុយ ទូច ប្រធានការិយាល័យបសុព្យាបាលខេត្ត បានប្រាប់ថា មន្ត្រីជំនាញបានឃាត់រថយន្ត១គ្រឿងដែលពាក់ស្លាក់លេខកំពង់ចាម ៣អា.១៤៩១ ដឹកជ្រូកចំនួន៤០ក្បាល ដែលគ្មានច្បាប់ ហើយនាំពីវៀតណាមចូលមកលក់ដល់ក្រុងប៉ោយប៉ែតជាប់ព្រំដែនថៃ។ ក្រោយពេលឃាត់រថយន្តដឹកជ្រូកនេះ គឺរកឃើញថារថយន្តនេះគ្មានលិខិតដឹកជញ្ជូនសត្វ និងគ្មានវិញ្ញាបនប័ត្របញ្ជាក់ពីសុខភាពសត្វទេ។ បន្ទាប់ពីឃាត់មន្ត្រីជំនាញបានយកជ្រូកនាំចូលគ្មានច្បាប់នេះទៅពិនិត្យ ដោយរកឃើញមានជំងឺឆ្លងប៉េស្ត ឬជ្រូកត្រចៀកខៀវ ។
លោកបានបញ្ជាក់ទៀតថា កាលពីថ្មីៗនេះរដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ ព្រមទាំងលោក សេន សុវណ្ណ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ បានដាក់វិធានការណ៍ក្តៅចំពោះសត្វដែលឈ្មួញលួចនាំចូលពីប្រទេសជិតខាងគ្មានច្បាប់ និងចំណីអាហារដែលនាំចូលពីប្រទេសវៀតណាម។ ហើយជ្រូកថៃដែលនាំចូលមកកម្ពុជា គឺគ្មានទេពេលនេះ ព្រោះថាជ្រូកនៅប្រទេសថៃថ្លៃជាងនៅស្រុកខ្មែរ ដោយឡែកឈ្មួញលួចនាំជ្រូកចូលពីវៀតណាមលក់ក្រុងប៉ោយប៉ែតជាយដែនថៃក្រោយពេលពិនិត្យ ហើយត្រូវបានចាត់ការតាមច្បាប់ជំនាញ៕
ប្រភព៖https://kohsantepheapdaily.com.kh/article/163334.html
