រន្ធត់ចិត្តខ្លាំង ពេលដឹងឥទ្ធិពលនុយក្លេអ៊ែរកូរ៉េខាងជើង បើបាញ់លើអាមេរិក

កូរ៉េខាងជើង មានអាវុធដែលអាចសម្លាប់ ពលរដ្ឋអាមេរិក ចំនួន៩០ភាគរយ។ នេះបើយោងតាមរបាយការណ៍ដ៏រន្ធត់ ពីអ្នកជំនាញស៊ើបការណ៍សម្ងាត់របស់អាមេរិក២រូប។

គ្រាប់មីស៊ីលចំនួន២០គ្រាប់ ត្រូវបានកូរ៉េខាងជើងបាញ់ កាលពីឆ្នាំមុន និងជាច្រើនគ្រាប់ នៅដើមឆ្នាំ២០១៧នេះ។ ទោះជាយ៉ាងណា អាកប្បកិរិយារបស់សហរដ្ឋអាមេរិក ទៅកាន់កូរ៉េខាងជើង ហាក់បីដូចជា មិនម៉ឺងម៉ាត់សោះ ខណៈប្រធានាធិបតីអាមេរិក លោក ដូណាល់ ត្រាំ បាននិយាយថា ការបាញ់នុយក្លេអ៊ែរមកលើអាមេរិក នឹងមិនកើតឡើងឡើយ។

អតីតនាយកស៊ើបការណ៍សម្ងាត់ នៃអង្គភាព US Central Intelligence លោក James Woolsey និង អតីតមន្រ្តី CIA លោក Peter Vincent Pry បានជំរុញឲ្យអាមេរិក ចាត់ទុកកូរ៉េខាងជើងជាការគំរាមធំបំផុត។

ជាមួយគ្នានេះដែរ មន្ត្រីស៊ើបការណ៍សម្ងាត់អាមេរិក ជឿជាក់ថា កូរ៉េខាងជើងកំពុងកាន់កាប់ មីស៊ីលឆ្លងទ្វីប (ICBM) ចំនួន២គ្រឿង ដោយក្នុងនោះ មានមួយគ្រឿងអាចចល័តបាន។

មិនតែប៉ុណ្ណោះ គេក៏ជឿជាក់ដែរថា មេដឹកនាំផ្ដាច់ការ គីម ជុងអ៊ុន មានកាន់កាប់គ្រាប់បែកអ៊ីដ្រូហ្សែន H-Bomb ដែលអាវុធទាំង២ប្រភេទនេះ អាចឆក់យកជីវិតមនុស្សរាប់លាននាក់ ប្រសិនបើបាញ់ទៅលើទីក្រុងធំៗ ដូចជា New York ជាដើម។

មន្ត្រីខាងលើបានប្រាប់ថា «ត្រូវតែការពារពលរដ្ឋអាមេរិកជាបន្ទាន់។ សហរដ្ឋអាមេរិក ចាំបាច់ត្រូវតែត្រៀមខ្លួន ដើម្បីចាត់វិធានការទប់ស្កាត់កូរ៉េខាងជើង រួមទាំងអាវុធនុយក្លេអ៊ែរទាំងនោះផងដែរ»។

មិនតែប៉ុណ្ណោះ ពួកគេក៏បានគាំទ្រលើការអះអាងដែលនិយាយថា កូរ៉េខាងជើង អាចរំខានប្រព័ន្ធអេឡិចត្រូនិក តាមរយៈការវាយប្រហារ EMP Attack (Electromagnetic Pulse) ដោយបំផ្ទុះគ្រាប់បែកនុយក្លេអ៊ែរ នៅពីលើសហរដ្ឋអាមេរិកទៀតផង។

«គ្រាប់បែកនុយក្លេអ៊ែរ ដែលបាញ់ដោយផ្កាយរណបកូរ៉េខាងជើង អាចនឹងធ្វើឲ្យសហរដ្ឋអាមេរិក ដាច់ចរន្តអគ្គិសនី និងហេដ្ឋារចនាសម្ព័ន្ធសំខាន់ៗផ្សេងទៀត រយៈពេល១ឆ្នាំ ហើយសម្លាប់មនុស្ស ចំនួន៩នាក់ក្នុងចំណោម១០នាក់ ដោយការអត់ឃ្លាន និងការដួលរលំសង្គម។ នេះបើតាមការបញ្ជាក់បន្ថែមរបស់មន្ត្រីខាងលើ៕