លោកឧកញ៉ា ម៉ុង ឫទ្ធី៖ កូនអើយ សូមកុំរកស៊ីមុខរបរណាដែលធ្វើឲ្យគេហូរទឹកភ្នែក

លោកឧកញ៉ា ម៉ុង ឫទ្ធី ដែលជាម្ចាស់ក្រុមហ៊ុនជាច្រើនដែលវិនិយោគលើវិស័យកសិកម្ម ដែលគេចាត់ទុកថាជាមនុស្សជោគជ័យលើអាជីវកម្មនោះនៅពេលថ្មីៗនេះ លោកឧកញ៉ាបានកោះហៅកូនៗ ទាំងកូនប្រសារ និងកូនបង្កើត ដើម្បីស្តីប្រដៅណែនាំឲ្យកូនៗប្រព្រឹត្តតែអំពើល្អជាពិសេសការប្រកបអាជីវកម្មណាដែលល្អជួយដល់ប្រជាជនកម្ពុជាយើង។
ក្នុងឱកាសនោះលោកឧកញ៉ាបានមានប្រសាសន៍ថា “ទ្រព្យច្រើនព្រួយរក្សា ទ្រព្យតិចណាព្រួយរិះគិត “ ពេលនេះឪពុកម្តាយនៅមានជីវិតអាចប្រមូលកូនៗមកស្តីប្រដៅបាន ចេះតែហៅមកប្រជុំណែនាំទៅ មិនយូរមិនឆាប់ទេឪពុកម្តាយ នឹងមិនបាននៅបន្តហៅកូនៗមកស្តីប្រដៅដូចពេលនេះតទៅទៀតទេ ។
លោកបានបន្តថា «ឪពុកម្ដាយ ចង់ឱ្យកូនៗយកតម្រាប់ណាដែលល្អៗ ដើម្បីបន្តវេនឱ្យប្រកបតែអាជីវកម្មណា ដែលសុច្ចរិត ចេះជួយដល់ជាតិប្រជាជនកម្ពុជាយើង ដូចដែលឪពុកម្តាយបាននិងកំពុងតែខិតខំ ពុះពារជម្នះគ្រប់ឧបសគ្គបំពេញភារកិច្ចនេះ មិនថាឡើយថ្ងៃឈប់សម្រាកបុណ្យទាន ឬសៅរ៍ អាទិត្យ បើទោះបីជាមានឧបសគ្គមករារាំងជាច្រើនលើកច្រើនសារយ៉ាងណាក្ដី»។
លោកបានបន្ថែមថា ពេលវេលាចេះតែខ្លីទៅៗហើយសម្រាប់ជីវិតឪពុកម្ដាយ បើកូនៗពិតជាគោរពស្រឡាញ់ឪពុកម្ដាយពិតប្រាកដមែននោះ សុំឱ្យកូនៗចេះរួបរួមសាមគ្គីគ្នា គោរពតាមឱវាទដូចខាងលើនេះទៅ ឪពុកម្តាយមិនចង់បានអ្វីក្រៅឱ្យកូនៗគោរពតាមឱវាទដូចខាងលើនេះទេ។

សូមបញ្ជាក់ថា មកដល់បច្ចុប្បន្ន លោកឧកញ៉ា បានចំណាយថវិកាជាច្រើនលើការងារមនុស្សធម៌ដូចជា កសាងសាលារៀន សង់ផ្ទះដល់ជនក្រីក្រ មន្ទីរពេទ្យ និងភូមិអភិវឌ្ឍន៍ បន្ថែមពីលើការបង្កើតអាជីវកម្មដែលបានជួយដល់កសិករកម្ពុជាឲ្យមានទីផ្សារផលិតផល និងផ្តល់ឱកាសការងារជាច្រើនដ៏កូនខ្មែរទៀតផង៕