ខេត្តស្វាយរៀង ៖សមត្ថកិច្ចវរការពារព្រំដែនច្រករបៀង ផ្លូវតាណេង បានបើកដៃឲ្យយួនដឹកជ្រូកពីប្រទេសវៀតណាមឆ្លងដែនខុសច្បាប់ចូលមកក្រុងបាវិតក្នុងមួយថ្ងៃៗរាប់រយក្បាល និងដឹកបន្តទៅរាជធានីភ្នំពេញសង្ស័យជ្រូកមានជម្ងឺដោយគ្មានការត្រួតពិនិត្យពីមន្ត្រីជំនាញការិយាល័យផលិតកម្ម និងបសុព្យាបាលនៃមន្ទីរកសិកម្មរុក្ខាប្រម៉ាញ់និងនេសាទខេត្តឡើយ ធ្វើឲ្យមានការព្រួយបារម្មណ៍យ៉ាងខ្លាំងអំពីសុវត្ថិភាពសុខាមាលភាពអ្នកបរិភោគសាច់ជ្រូក ។ ជ្រូកដែលយួននាំចូលឆ្លងដែននេះកើតឡើងកាលពីវេលាម៉ោង៩ព្រឹកថ្ងៃទី៣ ខែមេសា ឆ្នាំ២០១៧ នៅចំណុចច្រករបៀងផ្លូវតាណេង ជិតសាលាក្រុងបាវិត ស្ថិតនៅភូមិតាបិប សង្កាត់បាវិត ក្រុងបាវិត ។
បើតាមមន្ត្រីនគបាលម្នាក់បានបង្ហើបឲ្យដឹងថា ការសំរុកនាំជ្រូកពីប្រទេសយួនចូលតាមច្រករបៀងផ្លូវតាណេងនេះគឺជាង១០ថ្ងៃមកហើយគឺដើម្បីយកជ្រូកទៅខ្វៃ សែនឆេងម៉េង ។ ទាក់ទិនករណីខាងលើនេះដែរលោក មុំ ដារ៉ា ដែលជាមន្ត្រីយោធាវរការពារព្រំដែនលេខ២០១នៃតំបន់ប្រតិបត្តិការសឹករងស្វាយរៀង និងជាប្រធានច្រករបៀងផ្លូវតាណេងបាននិយាយថា ជ្រូកដែលឈ្មួញវៀតណាមនាំចូលតាមច្រករបៀងនេះក្នុងមួយថ្ងៃ១០ទៅ២០ក្បាលគឺគេមិនហៅថា ជ្រូកទេ បើគេហៅថា ជ្រូក លុះត្រាដឹកចាប់ពី១០០ក្បាលឡើងទៅទើបគេហៅថា ជ្រូក សូម្បីតែពេទ្យសត្វក្រុងក៏គេមិនដែលអើពើផងតិចពេក ។ លោកបន្តទៀតថា បើច្រករបៀង មនោរម្យ និងច្រកព្រៃតាអី គេដឹកក្នុងមួយថ្ងៃៗ៣០០ក្បាលឯណោះ ។
ចំពោះមន្ត្រីពេទ្យសត្វពុំមានសិទ្ធិ ឬច្បាប់អនុញ្ញាតិឲ្យទៅឈជើងនៅតាមប៉ុស្តិ៍ច្រករបៀងទេលើកលែងតែច្រកអន្តរជាតិទើបពិបាកក្នុងការចុះបង្ក្រាបហើយជ្រូកដែលនាំចូលពីប្រទេសវៀតណាមតាមច្រកព្រៃតាអី គឺជ្រូកក្រុមហ៊ុនដានីដេងនិងក្រុមហ៊ុន វ៉ាយខេអឹម(YKM) មានច្បាប់អនុញ្ញាតិពីអគ្គនាយកដ្ឋានសុខភាពសត្វ និងផលិតកម្មសត្វក្រសួងកសិកម្មរុក្ខាប្រម៉ាញ់និងនេសាទក្នុងមួយថ្ងៃ២៥០ក្បាលទៅ៥០០ក្បាល ។ ហើយមន្ត្រីបសុពេទ្យពិនិត្យតាមលិខិតអនុញ្ញាតិពីពេទ្យសត្វវៀតណាម និងច្បាប់នាំចូលប៉ុណ្ណោះពុំបានបូមឈាមជ្រូកយកទៅពិនិត្យ ឬធ្វើតេស្តឡើយ ។
បើតាមមន្ត្រីពេទ្យសត្វម្នាក់បានបញ្ចេញការព្រួយបារម្មណ៍បង្ហើបឲ្យដឹងថា នៅប្រទេសវៀតណាមជ្រូកកំពុងមានជម្ងឺ សាលម៉ូនីឡា ហើយមេរោគសាលម៉ូនីឡា នេះអាចឆ្លងមកមនុស្សបាន ហើយបើឆ្លងមកលើមនុស្សណានោះគឺមិនអាចព្យាបាលជាទេ គឺជាជម្ងឺរ៉ាំរ៉ៃ ។ មន្ត្រីរូបនេះបន្តទៀតថា កន្លងមករហូតបច្ចុប្បន្នប្រទេសកម្ពុជាយើងមាន ការ៉ង់តែន(CARANTENE) កន្លែងបង្ខាំងសត្វដើម្បីត្រួតពិនិត្យជីវៈសុវត្ថិភាពតែមួយកន្លែងគត់នៅសកលវិទ្យាល័យចំការដូង នេះជាការព្រួយបារម្មណ៍ដោយឈ្មួញបានរត់ការច្បាប់នាំមកប្រទេសខ្មែរ ហើយអគ្គនាយកដ្ឋានសុខភាពសត្វ និងផលិតកម្មសត្វអនុញ្ញាតិឲ្យនាំចូល ហើយមន្ត្រីជំនាញគ្រាន់តែពិនិត្យលើឯកសារមិនបានបូមឈាមជ្រូកយកទៅពិនិត្យធ្វើតេស្តជាថ្មីដើម្បីធានាពីជីវៈសុវត្ថិភាព ៕
