យោងតាមគេហទំព័រ Dailystar របស់ចក្រភពអង់គ្លេស ដែលបានចុះផ្សាយ នៅថ្ងៃច័ន្ទ ទី១៧នេះ បានឲ្យដឹងថា មេដឹកនាំកូរ៉េខាងជើង គីម ជុងអ៊ុន បានបង្ហាញកងទ័ពកុម្ម៉ង់ដូពិសេសថ្មី «Lightning Death Squad» ដែលត្រៀមខ្លួនរួចជាស្រេច ដើម្បីទប់ទល់ជាមួយកងទ័ពជើងទឹកសហរដ្ឋអាមេរិក «SEAL Team 6»។
កងកម្លាំងប្រតិបត្តិការពិសេស «Lightning Death Squad» ការវិភាគថ្មីមួយលើក្បួនដង្ហែយោធារបស់ទីក្រុងព្យុងយ៉ាង ក្នុងពិធីបុណ្យ «Day of the Sun» កាលពីថ្ងៃសៅរ៍ កន្លងទៅនេះ បានឲ្យដឹងថា កូរ៉េខាងជើង បានបង្កើតកងកម្លាំងប្រតិបត្តិការពិសេស ជាលើកដំបូង។
កងកម្លាំងពិសេសនោះ បានដើរជាក្បួន ខណៈលាបក្រែមពណ៌ខ្មៅនៅលើផ្ទៃមុខ ពាក់មួក និងពាក់វ៉ែនតាខ្មៅ ដែលអាចមើលឃើញច្បាស់នៅពេលយប់។ មិនតែប៉ុណ្ណោះ ពួកគេមានកាន់កាំភ្លើងប្រភេទថ្មី ដែលបំពាក់ដោយគ្រាប់បែកដៃ ទៀតផង។ នេះបើយោងតាមវីដេអូ ដែលផ្សាយបន្តផ្ទាល់ដោយស្ថានីយទូរទស្សន៍របស់រដ្ឋកូរ៉េខាងជើង។
គួររំលឹកថា កងទ័ពជើងទឹកអាមេរិក ដែលបានសម្លាប់អតីតមេដឹកនាំអាល់កៃដា អូសាម៉ាប៊ិនឡាដិន (Osama Bin Laden) គឺក្រុម «SEAL Team 6» នឹងចូលរួមនៅក្នុងការធ្វើសមយុទ្ធ នៅឯប្រទេសកូរ៉េខាងត្បូង ដើម្បីកម្ចាត់មេដឹកនាំផ្ដាច់ការកូរ៉េខាងជើង គីម ជុងអ៊ុន ចេញពីអំណាច។ នេះបើយោងតាមសារព័ត៌មាន Dailymail ដែលបានចុះផ្សាយ នាពេលកន្លងមក៕ ប្រភព៖ សប្បាយ
