ផ្ទុះការប៉ះទង្គិចថ្មីរវាងកងទ័ពទួរគី និងកងជីវពលឃើដស៊ីរី
កងទ័ពទួរគីបាននិយាយថា ការប៉ះទង្គិចថ្មីបានផ្ទុះឡើងកាលពីថ្ងៃសុក្ររវាងកងទ័ពទួរគី និងកងជីវពលឃើដស៊ីរីដែលរដ្ឋាភិបាលទីក្រុងអង់ការ៉ាចាត់ទុកថាជាក្រុមភេរវកម្មប៉ុន្តែជាសម្ព័ន្ធមិត្តដ៏សំខាន់របស់សហរដ្ឋអាមេរិកក្នុងការប្រយុទ្ធប្រឆាំងក្រុមជីហាដ។
គ្រាប់រ៉ុក្កែតបានបាញ់ចេញពីតំបន់មួយនៅក្នុងប្រទេសស៊ីរីដែលគ្រប់គ្រងដោយអង្គភាពការពារប្រជាជនឃើដ (YPG) ដោយកំណត់គោលដៅលើប៉ុស្តិ៍បញ្ជាការយោធាទួរគីនៅស្រុក Ceylanpinar នៃខេត្តភាគខាងត្បូង Sanliurfa របស់ប្រទេសទួរគី។
វាបាននិយាយថា កងទ័ពទួរគីបានបាញ់តបតទៅវិញដោយបានសម្លាប់ “ភេរវករ” ចំនួន១១នាក់។ ទោះយ៉ាងណាក៏ដោយ មិនមានរបាយការណ៍នៃអ្នកស្លាប់និងរបួសនៅផ្នែកខាងទួរគីទេ។
នេះគឺជាថ្ងៃទីបីហើយនៅក្នុងការប៉ះទង្គិចគ្នាដែលត្រូវបានគេរាយការណ៍នៅទូទាំងព្រំដែនបន្ទាប់ពីកងកម្លាំងអាកាសទួរគីបានទម្លាក់គ្រាប់បែកលើគោលដៅ YPG ក្នុងប្រទេសស៊ីរីកាលពីដើមសប្តាហ៍នេះ។
ក្រសួងការបរទេសអាមេរិកបាននិយាយថា ខ្លួនមាន “កង្វល់យ៉ាងខ្លាំង” ដែលការវាយប្រហារនេះត្រូវបានធ្វើឡើងដោយគ្មានការសម្របសម្រួលឲ្យបានត្រឹមត្រូវជាមួយសហរដ្ឋអាមេរិកឬក្រុមចម្រុះសកលប្រឆាំងនឹងក្រុម IS ។
ទន្ទឹមនឹងនេះដែរក្រសួងការបរទេសរុស្ស៊ីកាលពីថ្ងៃពុធបានឲ្យដឹងថា ការវាយឆ្មក់ទម្លាក់គ្រាប់បែករបស់ទួរគីគឺជាការមិនអាចទទួលយកបាននិងបានអំពាវនាវឲ្យភាគីទាំងអស់បង្ហាញពីការអត់ធ្មត់។ ប៉ុន្តែរដ្ឋាភិបាលទីក្រុងអង់ការ៉ាបានទទូចថា ក្រុងវ៉ាស៊ីនតោននិងក្រុងមូស្គូត្រូវបានជូនដំណឹងជាមុនយ៉ាងត្រឹមត្រូវ។
គួរបញ្ជាក់ថា ការប៉ះទង្គិចគ្នាថ្មីនេះបានកើតឡើងខណៈដែលលោកប្រធានាធិបតី Recep Tayyip Erdogan កាលពីថ្ងៃសុក្របានព្រមាន YPG ថា ទួរគីនឹងបាញ់តបតទៅវិញប្រឆាំងការវាយប្រហារណាមួយនិងគំរាមចំពោះការបង្កើតរដ្ឋឃើដណាមួយនៅភាគខាងជើងប្រទេសស៊ីរី៕
ប្រភព ៖ AFP
