លោកបាស្ហាអាល់អាសាដ ប្រមុខដឹកនាំស៊ីរី បានផ្តល់បទសម្ភាសន៍មួយដល់ទីភ្នាក់ងារបារាំងអាអែហ្វប៉េ កាលពីថ្ងៃពុធ ដោយលើកឡើងថា ការវាយប្រហារដោយប្រើអាវុធគីមីកាលពីថ្ងៃអង្គារសប្តាហ៍មុន គឺជារឿងប្រឌិត ១០០% ដោយប្រទេសលោកខាងលិច ដើម្បីយកធ្វើជាលេសបើកការវាយប្រហារលើកងកម្លាំងរដ្ឋាភិបាលស៊ីរី។ លោកហ្សង់ម៉ាក់ អេរ៉ូ រដ្ឋមន្រ្តីការបរទេសបារាំង បានឆ្លើយតបទៅវិញថា អ្វីដែលលោកអាសាដលើកឡើង គឺជាការភូតកុហក ១០០%។
កាលពីថ្ងៃអង្គារ ទី៤ មេសា ២០១៧ ជនស៊ីវិលយ៉ាងតិច ៨៧នាក់ ក្នុងនោះរួមមានទាំងកុមារ ៣១នាក់ផងត្រូវស្លាប់ នៅក្នុងការវាយប្រហារដោយអាវុធគីមី ដែលគេចោទថាជាទង្វើរបស់កងកម្លាំងលោកអាសាដ។ ៣ថ្ងៃក្រោយមក នៅថ្ងៃទី៧ មេសា លោកដូណាល់ត្រាំបានចេញបញ្ជាឲ្យកងទ័ពអាមេរិកបាញ់មីស៊ីល ៥៩គ្រាប់ វាយប្រហារទៅលើមូលដ្ឋានទ័ពអាកាសរបស់ស៊ីរី។
ស៊ីរី ក៏ដូចជារុស្ស៊ីដែលជាខ្នងបង្អែក តែងតែបានបដិសេធការចោទប្រកាន់របស់អាមេរិក និងសម្ព័ន្ធមិត្ត ហើយនៅថ្ងៃពុធកន្លងទៅនេះ លោកបាស្ហាអាល់អាសាដ ដោយផ្ទាល់បានចេញមុខបដិសេធ តាមរយៈបទសម្ភាសន៍ជាមួយនឹងទីភ្នាក់ងារព័ត៌មានបារាំងអាអែហ្វប៉េ។
លោកអាសាដបានលើកឡើងថា លោកមិនបានចេញបទបញ្ជាណាមួយឲ្យវាយប្រហារដោយអាវុធគីមីនោះទេ ហើយថា ស៊ីរី “ក៏លែងមានអាវុធគីមីណាសល់នៅក្នុងដៃទៀតដែរ » ពីព្រោះថា ស៊ីរីបានបោះបង់ចោលទាំងអស់នូវរាល់អាវុធគីមីរបស់ខ្លួន តាំងពី៣ឆ្នាំមុនម៉្លេះ។ ផ្ទុយទៅវិញ បើតាមលោកអាសាដ អ្វីដែលបានកើតឡើង “គឺជាការប្រឌិតឡើង ១០០% ដោយប្រទេសលោកខាងលិច ជាពិសេស សហរដ្ឋអាមេរិក ដើម្បីបានជាលេសបើកការវាយប្រហារមកលើស៊ីរី”។
ប្រភព៖http://www.pageth.info/archives/11816
