ក្រុមហ៊ុនគ្រឿងសមុទ្រធំបំផុតរបស់វៀតណាមទទួលសារព្រមានករណីអាហារពុលពីអាមេរិក

ក្រុមហ៊ុនវៀតណាម Ba Hai Company Limited បានទទួលសំបុត្រព្រមានមួយច្បាប់ដែលបានចុះកាលបរិច្ឆេទ ២១មិនាឆ្នាំ ២០១៧ ពីរដ្ឋបាលចំណីអាហារ និងឱសថ (FDA) សហរដ្ឋអាមេរិក ក្រោយរកឃើញត្រី និងផលិតផលគ្រឿងសមុទ្រមានជាតិពុល។

ក្រុមហ៊ុននាំចូល Ba Hai ត្រូវបានគេដឹងថា បាននាំចូលប្រភេទត្រីផ្សេងៗ និងផលិតផលគ្រឿងសមុទ្រច្រើនមុខទៀតដែលមានទីតាំងនៅប្រទេសវៀតណាម។ ប្រភេទត្រីមានជាតិពុលគួរឲ្យព្រួយបារម្ភទាំងនោះ គឺប្រភេទ Scombroid ដែលបានក្លាសេ្សដូចជាត្រីស្បៃកា ត្រីធូណា ត្រី Kahawai និងស្ដេចត្រីមេអំបៅ (Butterfly Kingfish) ដោយពួកវាមានសាច់ប្រែជាជាំខ្មៅ។

ពពួកត្រីសមុទ្រ Scombroid មានផ្ទុកសារធាតុគីមីម្យ៉ាងឈ្មោះ Histadine ហើយបាក់តេរីក្នុងខ្លួនត្រីត្រូវបម្លែងច្រើនឡើងៗពេលវាស្ថិតនៅក្នុងសីតុណ្ហភាពខ្ពស់ជាង ១៥អង្សា រួចប្រែទៅជាសារធាតុពុល Scombrotoxin តែម្ដង។ សារធាតុចម្បងក្នុង Scombrotoxin គឺ Histamine ដែលគេមិនអាចកាត់បន្ថយវាបានតាមរយៈការចម្អិនឡើយ។

FDA បញ្ជាក់ថា កម្រិតសារធាតុពុល Histamine អាចមានតិចជាង ៥០មិល្លីក្រាមក្នុងត្រីមួយគីឡូ តែបើកម្រិតចាប់ពី ២០០មិល្លីក្រាមក្នុងមួយគីឡូ ឬច្រើនជាងនេះ ត្រូវគេចាត់ទុកថាគ្រោះថ្នាក់ខ្លាំងចំពោះសុខភាព។

FDA បានព្រមានទៀតថា ប្រសិនបើក្រុមហ៊ុន Ba Hai មិនបានដោះស្រាយត្រឹមត្រូវទេ នោះផលិតផលត្រី Scombroid នឹងមិនអនុញ្ញាតឲ្យនាំចូលសហរដ្ឋអាមេរិកឡើយ៕