ស្នេហ៍ស្មោះពិតជាមានមែនទេ? គូសេ្នហ៍ភក្តីតាំងពីវ័យកុមារអាយុ ៨ឆ្នាំ ដ៏គួរឲ្យកោតសរសើរមួយគូ បានសម្រេចក្តីបំណងចុងក្រោយ ដោយស្លាប់ក្នុងរង្វង់ដៃគ្នាទៅវិញទៅមក ក្តាប់ដៃគ្នានៅលើគ្រែតែមួយនៅនាទីនៃដង្ហើយចុងក្រោយនៃអ្នកទាំងពីរបន្តបន្ទាប់គ្នា ក្រោយជីវិតអាពាហ៍ពិពាហ៍អស់រយៈពេល ៧៥ឆ្នាំ។
លោកតា Jeanette Toczko, អាយុ ៩៦ឆ្នាំ និងភរិយារបស់គាត់ លោកយាយ Alexander Toczko, អាយុ ៩៥ឆ្នាំ រស់នៅទីក្រុងសានឌីអាហ្គូ រដ្ឋ California បានស្លាប់បន្តបន្ទាប់គ្នាត្រឹមតែប៉ុន្មានម៉ោងប៉ុណ្ណោះ ដោយអ្នកទាំងពីរ ស្លាប់ក្នុងរង្វង់ដៃគ្នាទៅវិញទៅមក។
ស្នេហាមួយគូនេះបានចំណាយជីវិតរបស់ពួកគេក្នុងក្តីស្រឡាញ់យ៉ាងជ្រាលជ្រៅអស់រយៈពេល ជាង ៧៥ឆ្នាំ បន្ទាប់ពីស្គាល់គ្នា និងរាប់អានជាមិត្តភក្តិនៅពេលដែលពួកគេមានអាយុប្រាំបីឆ្នាំម្ល៉េះ។ ប៉ុន្តែទើបតែប៉ុន្មានសប្តាហ៍ក្នុងខែមិថុនា កន្លងទៅនេះ លោកតា Jeanette Toczko បានរងនូវគ្រោះថ្នាក់ដួលបាក់ត្រគៀក ដោយត្រូវសម្រាកនៅតែលើគ្រែ។
ដោយសារស្ថានភាពសុខភាពលោកតាវ័យចាស់ជរាកាន់តែដុនដាបខ្លាំងទៅៗ មន្ទីរពេទ្យក្នុងតំបន់ដែលបានមើលថែលោកតាបានប្រគល់គ្រែពេទ្យពិសេសសំរាប់លោកតាសម្រាកនៅផ្ទះរបស់គាត់វិញ ដោយដាក់នៅជិតគ្រែរបស់លោកយាយជាទីស្រឡាញ់របស់គាត់ ខណៈដែលសុខភាពរបស់លោកយាយក៏កាន់តែខ្សោយទៅៗដែរនោះ។
អ្នកទាំងពីរតែងតែនិយាយប្រាប់កូនចៅថា ពួកគាត់ចង់ចំណាយដង្ហើមចុងក្រោយ ស្លាប់នៅលើគ្រែរបស់ពួកគាត់ដែលស្ថិតក្នុងរង្វង់ដៃគ្នាទៅវិញទៅមក។
បើតាមកូនស្រីរបស់គូស្នេហ៍ស្មោះស្ម័គ្រ លោកស្រី Aimee Toczko-Cushman បានឱ្យដឹងថាឪពុកម្តាយរបស់លោកស្រីកើតនៅ ក្រុង Stamford, Connecticut ។ ដោយជីវិតស្នេហាលោកតា លោកយាយ បន្សល់កូន ៥នាក់ ចៅ ១០នាក់ ចៅទួត សរុប ៦នាក់ជាចំណងដៃ។
លោកស្រី Aimee Toczko-Cushman បានបន្តថា ៖ «ខ្ញុំបានប្រាប់ម្តាយរបស់ខ្ញុំថា គាត់ (លោកប៉ា) បានស្លាប់ហើយ។ គាត់បានឱបលោកប៉ា ហើយបាននិយាយទៅកាន់លោកប៉ាថា ឃើញទេ បងបានសម្រេចបំណងប្រាថ្នាហើយ…បងបានស្លាប់ក្នុងដៃអូន… អូនស្រឡាញ់បង រង់ចាំបន្តិចណា… អូននឹងទៅដល់ឥឡូវនេះហើយ…»។
ក្នុងស្ថានភាពក្តុកក្តួល សោកសាយ លាយឡំនឹងក្តីរំភើបគួរកោតសសើរពេកក្រៃពីទំហំនៃក្តីស្នេហារបស់លោកតាលោកយាយ កូនៗមានលោកស្រី Toczko-Cushman, និង Donna Tang, Richard Toczko, Lynne Edwards និង Andra Toczko ទាំងអស់គ្នា បានទុកពេលឲ្យលោកយាយ បាននិយាយពាក្យលាគ្នាខ្លះក្នុងបន្ទប់តែពីរនាក់នៅលើគ្រែនោះជាមួយសាកសពលោកតា Toczko ដែលទើបតែលាចាកលោកទៅ។
