ពិតអត់ កូរ៉េខាងជើង គ្រោងចាប់ជំរិតជនបរទេស បើសង្គ្រាមផ្ទុះឡើងមែន?

កូរ៉េខាងជើង គ្រោងនឹងយកភ្ញៀវទេសចរបរទេសធ្វើជាចំណាប់ខ្មាំង ប្រសិនបើសហរដ្ឋអាមេរិក វាយប្រហារប្រទេសកុម្មុយនិស្តនេះពិតមែន។ នេះបើតាមការបង្ហាញឲ្យដឹង ពីជនជាតិកូរ៉េខាងជើងដែលរត់ចោលស្រុកម្នាក់។

យោងតាមគេហទំព័រ Dailystar របស់ចក្រភពអង់គ្លេស ដែលបានចុះផ្សាយ នៅថ្ងៃអាទិត្យ ទី១៦ បានឲ្យដឹងថា ស្ថិតក្រោមការគ្រប់គ្រងរបស់មេដឹកនាំផ្ដាច់ការ គីម ជុងអ៊ុន ប្រទេសកូរ៉េខាងជើងបានបណ្តុះបណ្តាលក្រុមកងកុម្ម៉ង់ដូពិសេស ដើម្បីចាប់ជំរិតភ្ញៀវទេសចរ ប្រសិនបើសង្គ្រាមពិតជាផ្ទុះឡើងមែន។

ក្រុមចាប់ជំរិតពិសេសនោះ ត្រូវបានគេហៅថា «Snatch Squads» នឹងឆ្លងកាត់ព្រំដែនកូរ៉េខាងជើង ចូលទៅកូរ៉េខាងត្បូង ដើម្បីចាប់ជំរិតគោលដៅរបស់ពួកគេ។ នេះបើតាមការបង្ហាញប្រាប់ពីជនរត់ចោលស្រុក ដែលជាអតីតសមាជិកនៃក្រុមនេះ។

មិនតែប៉ុណ្ណោះ កងកម្លាំងពិសេសដែលប្រដាប់ទៅដោយសារធាតុពុលសាហាវទាំងនោះ ត្រូវបានណែនាំឲ្យសម្លាប់ចំណាប់ខ្មាំងរបស់ពួកគេទៀតផង។ ជាមួយគ្នានេះដែរ ពួកគេនឹងចាប់យកភ្ញៀវទេសចរ ឬពាណិជ្ជករបរទេស ហើយព្យាយាមនាំវិលត្រឡប់មកប្រទេសកូរ៉េខាងជើងវិញ។ ប៉ុន្តែ ប្រសិនបើពួកគេមិនអាចនាំវិលត្រលប់មកវិញទេ ពួកគេនឹងសម្លាប់ចំណាប់ខ្មាំងយ៉ាងព្រៃផ្សៃ នៅក្នុងប្រទេសកូរ៉េខាងត្បូង តែម្តង។

លោក Ung-gil Lee អាយុ៣៧ឆ្នាំ ដែលបានរត់ទៅរស់នៅប្រទេសកូរ៉េខាងត្បូង បន្ទាប់ពីបម្រើក្នុងក្រុមកងកុម្ម៉ង់ដូពិសេសនោះ អស់រយៈពេល៦ឆ្នាំ បានប្រាប់ឲ្យដឹងថា «ពួកគេនឹងចូលទៅកូរ៉េខាងត្បូង... ផ្លាស់ប្ដូរសំលៀកបំពាក់... ចូលទៅតំបន់ដែលមានជនបរទេសច្រើន រួចចាប់យកជនបរទេសមួយចំនួន។ ពួកគេចងចាំពីទីតាំង លេខទូរស័ព្ទ និងស្លាកលេខរថយន្តរបស់ស្ថានទូតធំៗ។ ពួកគេកាន់ថ្នាំបំពុលដ៏សាហាវ ឈ្មោះ Neostigmine Bromide និង Potassium Cyanide ហើយវាគឺជាបេសកកម្មអត្តឃាត»។

លោក Lee បានប្រាប់ឲ្យដឹងទៀតថា «ករណីដែលល្អបំផុតគឺ នាំយកចំណាប់ខ្មាំងត្រលប់មកកូរ៉េខាងជើងវិញ។ ប្រសិនបើមិនអាច ពួកគេនឹងចាប់ជំរិតចំណាប់ខ្មាំងនៅកូរ៉េខាងត្បូង ប៉ុន្តែពួកគេនឹងត្រូវស្លាប់ទាំងអស់»។

គួររំលឹកផងដែរថា កាលពីថ្ងៃអាទិត្យ ទី១៦ ម្សិលមិញនេះ ប្រទេសកូរ៉េខាងជើង បានបាញ់មីស៊ីលរបស់ខ្លួនទៅឆ្នេរសមុទ្រភាគខាងកើត តែត្រូវគេជឿថាមិនទទួលជោគជ័យនោះទេ។

ការបាញ់នេះបានធ្វើឡើងមួយថ្ងៃប៉ុណ្ណោះ បន្ទាប់ពីទីក្រុងព្យុងយ៉ាង បានគំរាមសហរដ្ឋអាមេរិកថា ពួកគេត្រៀមខ្លួនរួចជាស្រេច ដើម្បីវាយបកដោយប្រើអាវុធនុយក្លេអ៊ែរ ចំពេលដែលភាពតានតឹងកំពុងកើនឡើងកាន់តែខ្លាំងនៅឧបទ្វីបកូរ៉េ៕