អាជ្ញាធរក្នុងទីក្រុង Urumqi នៃតំបន់ស៊ីនជាំង លើកឡើងថា ខ្លួនបានទទួលសេចក្ដីណែនាំមួយពីថ្នាក់លើរបស់ខ្លួន ដែលបញ្ជាថា គ្រប់ទារកទាំងអស់ មិនត្រូវមានឈ្មោះទាក់ទងសាសនាហួសហេតុ ឬក៏បង្ហាញពីការបំបែកបំបាក់ឡើយ។ បម្រាមពេលនេះ គឺជាការពង្រីកការអនុវត្តបញ្ញត្តិឆ្នាំ ២០១៥ ដែលហាមការប្រើប្រាស់ឈ្មោះឥស្លាមសម្រាប់ទារកដូចជា Fatimah ឬ Saddam ជាដើមនោះ។ នេះ ក៏ជាសញ្ញាបង្ហាញពីការរឹតត្បិតរបស់អាជ្ញាធរជនជាតិហានទៅលើជនជាតភាគតិចនៅស៊ីនជាំងដែរ។
បើតាមទីភ្នាក់ងារព័ត៌មានរុស្ស៊ី Sputnik មន្ត្រីក្នុងទីក្រុង Urumqi និយាយថា បើមានករណីដូចខាងលើមែន ឪពុកម្ដាយទារក គួរប្ដូរឈ្មោះកូនពួកគេទៅ។ មន្ត្រីដដែលនេះ បន្តថា បើមានគ្រួសារណា មិនព្រមអនុវត្តតាមការសម្រេចនេះ ពួកគេ នឹងមិនត្រឹមតែមិនទទួលការរាប់អានពីសង្គមឡើយ ហើយអាចប្រឈមមុខបញ្ហាផ្សេងទៀតដូចជា មិនអាចទទួលបានការអប់រំ, ការងារ និងផលប្រយោជន៍សង្គមដទៃទៀត។
ជាការពិត វាជាការរឹតត្បិតលើជនមូស្លីមនៅតំបន់ស្វយ័តមួយនេះ។ ស៊ីនជាំង ជាខេត្តភាគខាងលិចបំផុតរបស់ចិន ដែលមានជនមូស្លីម Uighur ប្រមាណ ១១លាននាក់រស់នៅ។ ក្រៅពីជនជាតិ Uighur ដែលជាជនភាគតិច គេសង្កេតឃើញមានជនភាគតិចមួយចំនួនដែលអនុវត្តតាមសាសនាឥស្លាមដូចជាជនជាតិម៉ុងហ្គោលី, ជនជាតិតាជី (Tajiks) និងជនជាតិកាហ្សាក់ (Kazakhs) ជាដើម។ ពួកគេ យល់ថា វិធានការរបស់ក្រុងប៉េកាំង គឺជាការរើសអើងវប្បធម៌របស់ពួកគេ។
ដំណើររឿងដែលនាំឲ្យមានការរឹតត្បិតរបៀបនេះ ក៏ព្រោះតែការផ្ទុះឡើងកុបកម្មហិង្សាជាច្រើនថ្ងៃនៅស៊ីនជាំងកាលពីឆ្នាំ២០០៩ និងការរាតត្បាតក្រុមជ្រុលនិយមចេញពីប្រទេសដែលមានព្រំដែនជាប់ស៊ីនជាំង។ អាជ្ញាធរចិន បានយកវិធីសាស្ត្រធ្លាប់អនុវត្តក្នុងការរឹតត្បិតជនជាតិទីបេ មកប្រើប្រាស់នៅតំបន់ភាគខាងលិចនេះម្ដងវិញ។ ក្រុងប៉េកាំង បានចេញការហាមប្រាមជាច្រើនរាប់ទាំងការស្លៀកពាក់, ការអនុវត្តប្រពៃណី, ការដកហូតលិខិតឆ្លងដែន និងការទុកពុកមាត់តាមរបៀបឥស្លាមជាដើម។
ដោយសារការរើសអើងបែបនេះ មន្ត្រីស៊ីវិលនៅតំបន់ស៊ីនជាំងជាង ៨០ម៉ឺននាក់ មិនអាចគោរពប្រពៃណីរបស់ខ្លួនឡើយ ព្រោះខ្លាចបាត់បង់ការងាររបស់ពួកគេ។ ជារឿយៗ រដ្ឋាភិបាលចិន បានទម្លាក់កំហុសលើក្រុមមូស្លីម Uighur ចំពោះការអនុវត្តសាសនាជ្រុលនិយមក្នុងតំបន់ និងអំពើហិង្សាដែលកើតមានជាញឹកញយ។ ដោយសារមានព្រំដែនជាប់ប៉ាគីស្ថាន និងអាហ្វហ្គានីស្ថាន ចិន ពិតជាបារម្ភខ្លាំងការសាយភាយភេរវកម្មចូលមកតំបន់នេះ៕
ប្រភព៖ www.ThmeyThmey.com
