ក្រុងម៉ានីល: ជូលៀតា ឡូរ៉េនហ្សូ អាយុ ៦៩ ឆ្នាំ មានជំងឺប្រចាំកាយរស់នៅប្រទេសហ្វីលីពីន បានធ្វើឲ្យមនុស្សរាប់ពាន់នាក់កម្សត់ក្ដុកក្ដួលក្រោយពីរូបថតដូនចាស់អៀវកូនស្រីពិការវ័យ ៣០ ឆ្នាំទៅកាន់ធនាគារដើម្បីយកប្រាក់សោធន បានបង្ហោះក្នុងបណ្ដាញសង្គម។
រូបភាពដ៏គួរឲ្យអាណិតអាសូររបស់ដូនចាស់រូបនេះត្រូវបានថតដោយម្ចាស់ហ្វេសប៊ុកឈ្មោះ Gilbred Cargason Alsagon Jr ដែលស្ថិតនៅក្នុងសាខាធនាគារអភិវឌ្ឍន៍ក្នុងក្រុងរ៉ូសាស់ ពេលលោកយាយ និងកូនស្រីចូលមកដល់។
Alsagon រាយការណ៍ថា វត្ដមានស្ដ្រីចំណាស់អៀវកូនស្រីពេញកម្លាំងលើខ្នងបង្កការភ្ញាក់ផ្អើលដល់មនុស្សម្នាក្នុងធនាគារ ប៉ុន្ដែដ្បិតពួកគេទទួលបានជំនួយជាច្រើនពីអ្នកនៅជុំវិញខ្លួនយ៉ាងណាក៏ដោយ ក៏ស្ដ្រីចំណាស់នេះបដិសេធយ៉ាងសុភាពរាបសា ដោយនិយាយថា កូនស្រីរបស់ខ្លួនឈ្មោះ ម៉ារី ចេន មិនទុកចិត្ដនរណាមកជួយអៀវនាងទាំងអស់។
ម្ចាស់ហ្វេសប៊ុក Gilbred ថា លោកយាយ និងកូនស្រីមកធនាគារនេះរៀងរាល់ខែដើម្បីយកប្រាក់សោធននិវត្ដន៍របស់ដូនចាស់វ័យ ៦៩ ឆ្នាំចំនួន ៤០ ដុល្លារ ដែលពួកគេប្រើសម្រាប់ទិញអាហារចិញ្ចឹមជីវិត។
ក្រោយពីល្បីដល់ប្រព័ន្ធផ្សព្វផ្សាយជាតិធំៗ វាត្រូវបានលាតត្រដាងថា អ្នកទាំងពីររស់នៅក្នុងភូមិបូឡូ ខាងក្រៅក្រុងរ៉ូសាស់ របស់ហ្វីលីពីន និងត្រូវដើរកាត់ផ្លូវលំពិបាកដោយតោងឡើងឫសឈើដើម្បីទៅផ្ទះដែលពួកគេស្នាក់អាស្រ័យអស់ពេល ២៥ ឆ្នាំ៕
ប្រភព៖http://nowkh.com/article/1826
