បើយោងតាមប្រភពពីលោកគឹម ប្រុស ប្រធានសាខាកាំកុងត្រូលខេត្តស្ទឹងត្រែងបានអោយដឹងថា ការចុះត្រួតពិនិត្យនេះ គឺកម្លាំងជំនាញត្រួតពិនិត្យជាប់គ្នារយៈពេល២ថ្ងៃមកហើយ ចាប់ពីថ្ងៃ២៤មីនាមក ដើម្បីស្វែងរកផលិតផល ឬអាហារណាដែលមានផ្ទុកនូវសាធាតុធាតុគីមី ប្រសិនបើមានកម្លាំងជំនាញរបស់លោក ត្រូវដកហូតបំផ្លាញចោល ដើម្បីជៀសវៀងកុំអោយភ្ញៀវជាតិអន្តរជាតិទិញពិសារ ធ្វើអោយប៉ះពាល់ដល់សុខភាព ។
ជាកស្តែងការចុះត្រួតពិនិត្យនៅព្រឹកថ្ងៃទី២នៃពិធីបុណ្យទន្លេនេះ កម្លាំងជំនាញបានរកឃើញសត្វមឹកដែលមានផ្ទុកសារធាតុហាមឃាត់របស់អាជីវករថៃ Tes Kit formalin in food ចំនួន៤៨គីឡូក្រាម ហើយត្រូវបានដកហូតយកទៅបំផ្លាញចោលភ្លាមៗផងដែរ ។
គួរបញ្ជាក់ផងដែរថា បុណ្យទន្លេខេត្តស្ទឹងត្រែងក្នុងឆ្នាំនេះជាលើកទី៣ហើយ មានស្តង់លក់ផលិតផលគ្រប់មុខក្នុងឱកាសបុណ្យទន្លេនេះ មានតូបសរុបចំនួន៦០០តូប ក្នុងនោះមានតូបខ្មែរចំនួន៣០០ និងតូបអាជីវករថៃ និងវៀតណាមចំនួន៣០០តូប ។ ប្រារព្ធពិធីបុណ្យទន្លេនេះគេធ្វើនៅតាមបណ្តាខេត្តជាប់ដងទន្លេ បន្ទាប់ពីលើកទី១ ធ្វើឡើងនៅខេត្តកំពង់ចាម លើកទី២នៅខេត្តក្រចេះ និងទី៣ធ្វើនៅខេត្តស្ទឹងត្រែង ដោយមានភ្ញៀវទេសចរចូលរួមយ៉ាងច្រើនកុះករ ហើយមានស្តង់លក់ទំនិញគ្រប់ប្រភេទ មានដូចជា លក់ចំណី អាហារ ភេសជ្ជៈគ្រប់មុខ សម្ភារៈប្រើប្រាស់ផ្សេងៗ ចំណែកឯកម្លាំងប្រដាប់អាវុធ ក្រុមគ្រូពេទ្យ ព្រមទាំងរថយន្តសង្គ្រោះអគ្គិភ័យវិញ ត្រូវគេសង្គេតឃើញបានយកចិត្តទុកដាក់លើការរក្សាសន្តិសុខជូនប្រជាពលរដ្ឋបានល្អផងដែរ ៕
