ពេជ្រ អាវីហ្សា ជួបគ្រោះថ្នាក់ចរាចរណ៍បុកគ្នាពេញទំហឹងយប់មិញ

ពេជ្រ អាវីហ្សា ជួបគ្រោះថ្នាក់ចរាចរណ៍ ដោយបានបុកគ្នាយ៉ាងពេញទំហឹងជាមួយម៉ូតូមួយគ្រឿងមានគ្នា២នាក់ បើកបរក្នុងទិសដៅបញ្ច្រាសគ្នា ខណៈនាងជិះឡាន Lexus GS 300 ពាក់ស្លាកលេខ 2R 2141 នៅលើមហាវិថីសុធារស កាលម៉ោង៣រំលងអាធ្រាត្រឈានចូលថ្ងៃថ្មី។
ឆ្លើយតបតាមរយៈវីដេអូរបស់ TVFB តារាសម្តែងស្រីរូបនេះ ប្រាប់ថាក្នុងហេតុការណ៍យប់មិញនាងបានចេញពីញ៉ាំអីជុំគ្នាជាមួយមិត្តភក្តិក្នុងហាងមួយកន្លែង ដែលក្នុងនោះនាងអះអាងថា ភាគីខាងម៉ូតូ មានភាពស្រវឹងខ្លាំង ហើយបានមកបុកឡាននាងទាំងស្រុង។ រៀបរាប់បណ្ដើរយំបណ្តើរ ពេជ្រ អាវីហ្សា នាងថាពិតជាបានទទួលទានគ្រឿងស្រវឹង ប៉ុន្តែមិនច្រើននោះឡើយ ហើយនាងអះអាងថាក្នុងនាមនាងជាអ្នកសិល្បៈ នាងសុំទទួលខុសត្រូវលើរឿងរ៉ាវគ្រោះថ្នាក់ចរាចរណ៍នេះ។

“ខ្ញុំភាគីខាងឡាន ខ្ញុំនឹងរ៉ាប់រង ក្នុងករណីនេះ តែខ្ញុំមិនមានចេតនា បុកគាត់ទេ ដែលពេលនោះខាងម៉ូតូជាអ្នកបុកឡានខ្ញុំ គាត់ជិះជ្រេពេញហ្នឹង ហើយខ្ញុំក៏មិនរត់ទៅណាដែរ ពេលភ្លាមៗនៅកន្លែងកើតហេតុ ខ្ញុំនៅហ្នឹងរហូត"។ ពេជ្រ អាវីហ្សា ថ្លែង។
យ៉ាងណាមិញ ក្រុមការងារបានព្យាយាមទាក់ទង ពេជ្រ អាវីហ្សា ដើម្បីបញ្ជាក់កាន់តែច្បាស់ជុំវិញបញ្ហានេះ ប៉ុន្តែទាក់ទងមិនបាន ដោយសារលេខទូរសព្ទដែលនាងធ្លាប់ប្រើកំពុងជាប់រវល់។ គួរបញ្ជាក់ថាថ្មីៗនេះ ពេជ្រ អាវីហ្សា ទើបតែមានបញ្ហាធំជាមួយសង្សារ រហូតដល់កើតមានករណីអំពើហិង្សាលើរូបរាងកាយ៕