ជនជាតិដើមភាគតិចជងខេត្តកោះកុង ត្រេកអរជាខ្លាំង និង ថ្លែងអំណរគុណដល់ សម្តេច ហ៊ុន សែន លុបគម្រោងសាងសង់ទំនប់វារីអគ្គិសនីនៅតំបន់អារ៉ែង…

ភ្នំពេញ ៖ គណៈកម្មការ សហគមន៍ជនជាតិដើមភាគតិចជង ខេត្តកោះកុងនឹងរៀបចំវេទិការសាធារណៈ មួយនៅថ្ងៃទី២១ ខែមីនា ឆ្នាំ២០១៧ នៅភូមិជំនប់ ឃុំជំនប់ ស្រុកថ្មបាំង ខេត្តកោះកុង ដើម្បីថ្លែងអំណរគុណសម្តេចនាយករដ្ឋមន្ត្រីហ៊ុន សែន ដែលលុបគម្រោងសាងសង់ទំនប់វារីអគ្គិសនីនៅតំបន់អារ៉ែង។

យោងតាមសេចក្តីប្រកាសពត៌មាន ដែលចេញផ្សាយកាលពីថ្ងៃទី១៦ ខែមីនារបស់គណៈកម្មការ សហគមន៍ជនជាតិដើមភាគតិចជង ខេត្តកោះកុងបានឲ្យដឹងថា «ក្នុងនាមឲ្យ គណៈកម្មការ សហគមន៍ជនជាតិដើមភាគតិចជង ខេត្តកោះកុង សូមគោរពជូនដំណឹងថា យើងខ្ញុំគ្រោងរៀបចំវេទិការសាធារណៈ មួយនៅថ្ងៃទី២១ ខែមីនា ឆ្នាំ២០១៧ នៅភូមិជំនប់ ឃុំជំនប់ ស្រុកថ្មបាំង ខេត្តកោះកុង»។

តាមសេចក្តីប្រកាសពត៌មានដដែលបានបន្តថាវេទិកានេះធ្វើឡើងក្នុងគោលបំណងចំនួន៣ គឺ ៖
ទី១. សេចក្តីថ្លែងអំណរគុណសម្តេចនាយករដ្ឋមន្ត្រីហ៊ុន សែន ដែលលុបគម្រោងសាងសង់ទំនប់វារីអគ្គីសនីនៅតំបន់អារ៉ែង។
ទី២. បង្ហាញពីការរំលោភសិទ្ធិប្រពៃណីរបស់ជនជាតិដើមភាគតិចទាក់ទង នឹងមុខរបរចិញ្ចឹមជីវិត។
ទី៣. សំណើសុំពន្លឿនការចុះបញ្ជីដីសមូហភាពជូនជនជាតិដើមភាគតិចជង។

ការប្រកាសរបស់ប្រមុខរដ្ឋាភិបាល ដែលមិនសាងសង់ទំនប់វារីអគ្គិសនីនៅតំបន់អារ៉ែង ធ្វើឡើងក្នុងពេលប្រជុំគណៈរដ្ឋមន្ត្រី នាវិមានសន្តិភាពកាលពីថ្ងៃទី១៧ ខែកុម្ភៈ ឆ្នាំ២០១៧កន្លងទៅ។ ព័ត៌មាននេះដំបូងឡើយត្រូវប្រកាសដោយលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន តាមហ្វេសប៊ុក របស់លោក។ លោក ខៀវ កាញារីទ្ធ សរសេរថា «សម្តេច ហ៊ុន សែន សម្រេចថា តំបន់អារ៉ែង មិនត្រូវធ្វើវារីអគ្គិសនីទេ តែត្រូវធ្វើជាតំបន់ទេសចរណ៍ធម្មជាតិវិញ»៕