ឈាមស្រែកស្បែកហៅ…ជនសង្ស័យម្នាក់ ដែលបានប្រើអំពើហឹង្សា ទៅលើក្រុមគ្រួសារមួយ ព្រមទាំងសំលាប់ទារិកាម្នាក់ផងនោះ ត្រូវបានចាប់ខ្លួនហើយ

ខេត្តបាត់ដំបង ៖ នេះពិតជា ឈាមស្រែក ស្បែកហៅមែន ជនសង្ស័យម្នាក់ដែលបានប្រើអំពើហឹង្សាទៅលើក្រុមគ្រួសារមួយ ព្រមទាំងបានសំលាប់ទារិកាម្នាក់ផងនោះ ត្រូវបានសមត្ថកិច្ចនៃអធិការដ្ឋាន នគរបាលស្រុកមោងឫស្សីធ្វើការឃាត់ខ្លួន បន្ទាប់ពីជនសង្ស័យរូបនេះបានរត់គេចខ្លួនពីស្រុកសំពៅលូន មកសំងំលាក់ខ្លួននៅក្នុងទឹកដីស្រុកមោងឫស្សី ។ ពិតជាឈាមស្រែក ស្បែកហៅមែន គួរបញ្ជាក់ដែរថា កាលពីវេលាម៉ោង ៩ និង ៣០ នាទី យប់ថ្ងៃទី២ ខែមីនា ឆ្នាំ២០១៧ ត្រង់ចំណុចភូមិគីឡូ១៣ ឃុំសន្តិភាព ស្រុកសំពៅលូន ខេត្តបាត់ដំបង មានករណីឃាតកម្មគិតទុកជាមុនមួយ បានកើតឡើងទៅលើក្រុមគ្រួសារមួយ ដែលទំនងបណ្តាលមកពីការចង់ចាប់រំលោភ ទៅលើក្មេងស្រីអាយុ១១ឆ្នាំមិនបានសម្រេច ។

ស្ត្រីរងគ្រោះឈ្មោះ ប្រាក់ ផល្លា អាយុ៣០ឆ្នាំ រស់នៅត្រង់ចំណុចកើតហេតុ បានរៀបរាប់ថា នៅពេលដែលឮកូនស្រីរបស់នាងស្រែកនៅក្នុងបន្ទប់ទឹកបែបនេះ នាងក៏បានដាក់កូនតូចអោយដេកជាមួយបងប្រុសវានៅក្នុងមុង រួចក៏ចុះមកដីឃើញកូនស្រីប្រាប់ថា ពូ សី ចាប់ខ្លួនខ្ទប់មាត់ អោយនៅអោយស្ងៀម ទើបខ្លួនខំប្រឹងរើបម្រះចេញមកខាងក្រៅ ។

នៅពេលនោះដែរ គេបានឮសំលេងក្មេងស្រីឈ្មោះ សួន ស្បៃ អាយុ១១ឆ្នាំស្រែកនៅក្នុងបន្ទប់ទឹក ខាងក្រោយផ្ទះ ដោយអ្នកភូមិស្មានថា ម្តាយវ៉ៃដោយសារតែកូនស្រីរូបនោះមិនព្រមទៅងូតទឹក ។ សាក្សីបានបន្តថា លុះនៅពេលឮស្រែកជាលើកទី២ អ្នកភូមិក៏បានស្ទុះចេញមក ឃើញឈ្មោះ ហុង ពិសី ភេទប្រុស អាយុ៣៣ឆ្នាំ រស់នៅក្នុងភូមិជាមួយគ្នាដើរចេញមក ពីក្នុងបន្ទប់ទឹកហើយបានយកវត្ថុអ្វីម្យ៉ាងមកវាយលើអ្នកជិតខាងនោះតែម្តង បណ្តាលអោយរងរបួស ភ្លាមៗនោះដែរក៏មានរឿងកើតឡើងជាមួយនឹងម្តាយក្មេងស្រីនោះថែមទៀត រហូតធ្វើអោយមានការភ្ញាក់ផ្អើលដោយសារតែជនបង្ករូបនេះ បានលបចូលទៅសំលាប់ទារិកាដែលកំពុងដេកនៅក្នុងមុងខាងលើផ្ទះ ។

ស្ត្រីរងគ្រោះបានបន្តថា ភ្លាមៗនោះដែរជនសង្ស័យឈ្មោះ សី បានស្ទុះមកវ៉ៃខ្លួន ព្រមទាំង កូនស្រីផង ដោយគេបានប្រើប្រាស់ដុំឥដ្ឋចំនួនពីរដុំ ដែលបណ្តាលអោយពីរនាក់ម្តាយ និងកូនរងរបួសត្រង់ក្បាលដូចគ្នា ហើយនាងក៏បាននាំកូនស្រីរត់ចេញទៅក្រៅផ្ទះ ដើម្បីអោយផុតពីការប្រើហឹង្សាបែបនេះ ប៉ុន្តែការសំងំក្រៅផ្ទះបានប្រហែល ១៥ នាទីប៉ុណ្ណោះទើបនឹងឃើញដល់កូនតូចពីរនាក់ដែលកំពុងដេកក្នុងមុងខាងលើផ្ទះ ។ នៅពេលរត់ឡើងដល់ខាងលើផ្ទះគឺនាងមានអារម្មណ៍ស្លុតដោយសារតែឃើញមុងដែលកូន តូចៗដេកត្រូវដាច់ខ្ទេចខ្ទី ពេលបើកមុងឡើងឃើញកូនស្រីតូចឈ្មោះ សួន នុត អាយុជាងមួយខែ មានហូរឈាមតាមមាត់ និងច្រមុះ រីឯកូនប្រុសបងឈ្មោះ សួន ធិត អាយុ៤ឆ្នាំ ឮសម្រែកតែបន្តិចក៏ស្ងាត់មាត់ទៅវិញ ទើបខ្លួនបានត្រកងកូនទាំងពីរចុះមកដី ពឹងពាក់ម៉ូតូអ្នកភូមិអោយជួយដឹកមកកនា់មន្ទីរពេទ្យបង្អែកស្រុកសំពៅលូន ទើបដឹងថាកូនស្រីបានស្លាប់បាត់ទៅហើយ ក្រោមសម្ពាធនៃដុំឥដ្ឋរបស់ជនសង្ស័យរូបនោះ ។