អាថ៌កំបាំងធ្វើឲ្យគ្រួសារមានសុភមង្គលពីស្ត្រីចំណាស់ម្នាក់

មានប្ដីប្រពន្ធពីរនាក់បានរស់នៅជាមួយគ្នាយ៉ាងមានសុភមង្គលចាប់តាំងពីក្មេងៗរហូតដល់ចាស់ៗរាងខ្លួន។ ពួកគាត់ទាំងពីរតែងចែករំលែកគ្រប់រឿងទៅវិញទៅមកមិនដែលលាក់បាំងគ្នាទេលើកលែងតែរឿងមួយប៉ុណ្ណោះ។ ប្រពន្ធចំណាស់បានប្រាប់ប្ដីថាមិនត្រូវបើកប្រអប់ដែលខ្លួនទុកនៅលើដំបូលទូខោអាវជាដាច់ខាត។ បុរសជាប្ដីក៏មិនដែលសួរនាំអីដែលព្រោះគិតថាប្រហែលគ្រាន់តែជាសម្ភារៈប្រើប្រាស់ស្រីៗតែប៉ុណ្ណោះ។

ថ្ងៃមួយ លោកយាយមានជំងឺជាទម្ងន់ដែលត្រូវទៅសម្រាកនៅមន្ទីរពេទ្យ។ លោកយាយបានប្រាប់លោកតាឲ្យយកប្រអប់នោះមកឲ្យគាត់នៅមន្ទីរពេទ្យព្រោះដល់ពេលដែលត្រូវបង្ហាញការពិតហើយ។

បន្ទាប់ពីបើកប្រអប់នោះ លោកតាភ្ញាក់ព្រើតព្រោះឃើញក្នុងនោះមានកូនតុក្កតាចាក់ដោយដៃចំនួនពីរ និងលុយ $ ៩៥, ០០០។ លោកតា សួរលោកយាយទាំងឆ្ងល់ថា តើបានលុយច្រើនបែបនេះមកពីណា? លោកយាយឆ្លើយថា៖
«មុនពេលរៀបការ លោកយាយអូនបានប្រាប់នូវអាថ៌កំបាំងមួយដើម្បីឲ្យជីវិតប្ដីប្រពន្ធជោគជ័យ គឺថាមិនត្រូវឈ្លោះគ្នាទេ។ គាត់ផ្ដាំថា បើមានជម្លោះកើតឡើងជាមួយប្ដី ចៅត្រូវអង្គុយចុះ ហើយយកអំបោះចាក់កូនតុក្កតាដើម្បីរំងាប់អារម្មណ៍។»
បុរសចំណាស់ពិតជាមានអារម្មណ៍ក្ដុកក្ដួលយ៉ាងខ្លាំងបន្ទាប់ពីឮពាក្យនេះ។ គាត់សម្លឹងមើលទៅក្នុងប្រអប់ ឃើញកូនតុក្កតាតែពីរប៉ុណ្ណោះក្នុងនោះ។ នេះបានន័យថាក្នុងរយៈពេល៥០ឆ្នាំចាប់តាំងពីគាត់បានរៀបការ ហើយរួមរស់ជាមួយគ្នាមក ពួកគាត់ទាំងពីរធ្លាប់មានជម្លោះតែពីរដងប៉ុណ្ណោះ។
គាត់អង្អែលស្មា ហើយថើបលោកយាយទាំងរំជួលចិត្តសួរបន្ត៖
«ប៉ុន្តែ ចុះលុយដ៏ច្រើននេះអូនបានមកពីណា?»
«អូហ៍!....» លោកយាយឆ្លើយទាំងញញឹម «លុយនេះបានមកពីការលក់កូនតុក្កតា...៕»

ប្រភព៖ Brightside
ប្រភព៖ kanha